SUKI GUI 2 - Cho Bible Common Language 2016

Bochim Gawnu ung Bawipa ah Khan chang

¹ Bawipa ah khanchang naw Kilkal ungka naw Bochim ah hteit neta, Israel gu a pyen nak gui cu, “Kei naw Egypt khaw ung ka ning plawk ba gui ne, nami pupa gui am shai ka taak ah khaw ung ka ning law püi gui ci. Kei naw ka pyen cu, ‘Nang mi awn ka thukhän cu api ah phi kä ka m’shet khai.

² Nangmi naw Shin ah khaw ung om ciah chang awn api ah phi thukhän kä nami bi vai. Nangmi naw ami sowkyang gui cu nami phyet vai kyak ci. Cun ung phi ka pyen ah mäih ah nangmi naw kä nami bik ci. Nangmi naw hnu ng’tuk khai nami bik ci!

³ Cun ah kyasei nangmi nami kai law ung phi shin ah chang gui cu kä ka k’täm gui khai. Ngami cu nangmi ah ga ah kyak khai gui, ngami naw ami khawihnah ah khanpughi gui cu nangmi ah phäh ah cunnu ah kyak khai.”

⁴ Khanchang naw shin ah thu a pyen vai-am Israel chang gui ami van cu kyap ci gui,

⁵ Cun ah kyasei cun ah hmun cu Bochim ah pyen ci gui. Acun ung ngami naw Bawipa cu Khawihnah nak douthak ci gui.

Joshua asih ah mawng

⁶ Joshua naw Israel chang gui cu tüi gui sei, hteit u ne, ami mät ah chaw phäh phäh vai ah khaw cu ka nak ci gui.

⁷ Joshua a ghin yah ah chuih Israel chang gui naw Bawipa cu khawihnah ci gui, ani a sih kawn ung phi, Bawipa naw Israel gui ah hmawk ah küikyang ciah abi gui avan ami mät naw hmuk ci gui ah ami ng’vai gui ami ghin ah chuih ngami naw yum gäk gäk ci gui.

⁸ Bawipa ah changshäm, Nun ah hta Joshua cu a khaw kum phya la kum gha ung sik ci.

⁹ Ani cu amät ah khaw ah kyak ciah Kaash m’htung ah a siip täng, Ephraim khaw-gui, Timnath serah ung k’phuh ci gui.

¹⁰ Acun ah ng’shon ung ka chang gui cu si yawp u sei, acun tawi lawk ciah ng’shon gui naw Bawipa la Israel gui ah hmawk ah ani naw abi gui cu m’hnih ci gui.

Israel gui naw Bawipa ami khawihnak nak nawng ci gui

¹¹ Israel chang gui cu Bawipa hnu ng’tuk püi ne katnak bi u ne, Baala gui cu tün ne khawihnah ci gui.

¹² Ngami naw Egypt ah ka law püi ba gui ciah Khanpughi, ami pupa gui ah Khanpughi, Bawipa ami khawihnah nak cu nawng u ne, a mi pei yung ah om ciah chang gui ah ami khawihnah ah ami khanpughi gui cu tün ne khawihnah tuk ci gui. Ngami naw acun gui ah ma ah kawp u ne Bawipa cu m’lungshe sak ci gui.

¹³ Ngami naw Bawipa Khawihnah nak cu nawng u ne, Baala la Astarte gui cu khawihnah ci gui.

¹⁴ Bawipa naw Israel gui ah khan ah m’lungshe aih neta, ng’tuk’bi gui am tuk sak gui ci. Ani naw ga gui avan cu ami khaw ah huham mah sak gui khäta, Israel gui cu ami mät naw ami mät kä shung vong ba hning ci gui.

¹⁵ Ng’tuk nak ah ami hteh pang ung phiBawipa naw a pyen ah mäih ah hnu ng’tuk püi gui ci. Ngami cu ang htei ah khüikha ci gui.

¹⁶ Cun kawn ah Bawipa naw Israel gui am, tu gui ciah ga gui ung hun gui khai ah ami ng’vai gui cu pe gui ci.

¹⁷ Cun ung phi Israel gui cu ami ng’vai gui ah bek kä ngai ci gui. Israel cu Bawipa ung kä bekhüt ne, a hei khanpughi gui cu khawihnah ci. Ami pupa gui naw Bawipa ah thumkhän cu läk ci gui, cun ung phi shin ah ng’shon k’thai naw cun ah kä bi ba ci gui.

¹⁸ Bawipa naw Israel am ang vai tumat a pek pang ung, cun ah ang vai a ghin ah chuih Bawipa naw ani cu n’htei ne, chang gui phi ami ga ah kut ung ka hun gui ci. Ngami cu ng’ho ei nak, aktä yaica nak la shedam nak ung ami gawk yah ung Bawipa naw chimgei gui ci.

¹⁹ Cun ung phi ami ng’vai gui a sih ah a kyak ung, chang gui cu cau ami om man ah ng’hlat ba ci gui. A yanä ng’shon ah ta sheka pi ci gui. Ngami cu a hei khanpughi gui khawihnah ne abi bi u ne, ami om k’she ami nawng vai ah mak ci gui.

²⁰ Cun kawn ah Bawipa naw Israel gui ah khan ah m’lung she neta a pyen cu, “Kei naw ami pupa gui am, ami khäm vai ah ka ng’thu khan ah thukhän cu shin ah pakhui naw m’shet pyi ci nei. A i ah kyasei ci ung ngami naw kei kä na läk ci gui,

²¹ Joshua a sih sang ge ung shin ah khaw ung om ciah chang pakhui gui cu kei naw kä ka k’täm ba gui khai.

²² Israel gui naw ami pupa gui ah mäih ah kei ah lam ami läk la kä ami läk hmat nak vai ah shin gui cu kei naw ka mang gui khai.

²³ Cun ah kyasei Bawipa naw cun ah pakhui gui cu, cun ah khaw ung om sak gui lä ci, ani naw Joshua awn ngami ah khan ah ang näng nak vai kä pek ci, Joshua a sih kawn ah phi kä k’täm ci gui.