SUKI GUI 19 - Cho Bible Common Language 2016

Levit la akchuba

¹ Israel gui ung ghangpughang kä a om pha ung, Shou ciah Epraim khaw-gui khaw ah Levit tumat om ci. Ani naw Judah khaw Bethlem ung ka hnumi hta chu na tu ba ci,

² Cun ung phi cun ah hnunmi naw ani cu m’lungshe na neta, Bethlehem apa ah im ah hteit ba ne, cha phli om tu ba ci.

³ Cun kawn ah pami naw a hnu läk law neta, ani ah om nak ah law ba khai ah ng’ge püi ci. Hnumi hta naw Levit cu im kyong ah khü law sei, apa naw hmu neta, yeikyai ne ana dou ci.

⁴ Apa naw a om tu vai ah chou sei, ani cu hnüüp thum om tuk ci. Ang chu ng’la goi cu a cu ah ei aw tu ni ne, a cu ah ip tuk ci goi.

⁵ A phli hnüüp khaw ngawi hta ah thou law u neta, ani cu hteit ba khai ah pawng ci. Cun ung phi hnumi hta ah pa naw Levit am “ei ei ma cang ä, cun ung va gai ne na hteit khai” cik ci.

⁶ Cun ah kyasei chang hnih cu ngo ni ne, a täng ah ei awk ci goi. Cun kawn ah hnumi hta ah pa naw, “Mü ä tip ba ne lün lawi ba cang ä” cik ci.

⁷ Levit cu hteit ba khai ah ng’düi law ba ci, cun ung phi hnumi ah pa naw chou ba ci, cun ah kyasei mü ä tip tu ba ci.

⁸ A hnüüp hma nak khaw ngawi hta ah ani cu hteit ba khai ah pawng ci, cun ung phi hnumi hta ah pa naw, “Na bä ne, ei ei cang ä. Khaw plang güt om cang ä” cik ci. Cun ah kyasei chang hnih cu a täng ah ei ei ci goi.

⁹ Cun ah chang la ak chuba ni, ak changshäm ni cu hteit ba khai gui ah pawng ba ci gui, ami pa naw pyen ba mä ne, “Teng ä, khaw mü hun law pyi ci nei; mü ät om b cang ä. Khaw hmüp law ge ci nei, shin ung om ba ne, akhin ah ip tu ba cang ä. Ngami ung khaw ngawi hta ng’dawt ah let law ne, na hteh ba ung bä khai nei” cik ci.

^10-11 Cun ung phi acun ah chang cu acu ah kä ip tu ba hlük ci, cun ah kyasei ani la ak chuba cu akchang sham awn ngoh nak phah ah sela awn hteit ba ci gui. Ngami cu Jebus (Jerusalem) ah pei ah ami gawk law ung khaw mü law pyi ci, cun ah kyasei changshäm naw a bawi am, “Shin ah Jebusit mang gaw ung ng’düm ne, mi ip tuk khai nei” cik ci.

^12-13 Cun ung phi a bawi naw, “Israel chang gui ah kä om nak ah mang gaw ung mikmi kä mi ng’düm khai nei. Mikmi naw shin cu phlän ne, api mi hteit ban eta, Kibeah käcung Ramah ung mi ip khai nei” cik ci.

¹⁴ Cun ah kyasei ngami cu Jebus phlän ne k’täi ne hteit ci gui. Ngami Benjamin pakhui ah khawpäng Kibeah ung ami gawk law yah ung khoni hang kya pyi ci.

¹⁵ Ngami cu lam ung ng’hlat ne, cu mü a cu nip ci gui. Ngami cu mang gaw kyong ah lut u ne, a awng nak ung ngok ci gui, cun ung phi a u naw khü ne im ung kä m’ih tu gui ci.

¹⁶ Ngami cun ung ami ngoh yah ung, lo ah bi bik ciah a ghipa nu lawk ci. Ani cu Ephraim khaw-gui ung om te ciah kyak ci, cun ung phi tuhbäi Kibeah ung om ci. (Cun ung om ciah a hei chang gui cu Benjamin pakhui ah kyak ci gui.)

¹⁷ A ghipa nu naw mang gawk haw awn gung om ciah lam hteit gui cu teng gui kheng neta, “Nang mi a hawi ka nami lawk ci nei” A hawi nami hteit khai nei” cine ng’shi gui ci.

¹⁸ Levit chang naw, “Keimi cu Judah khaw, Bethlehem ah kami hteit te ci, tuhbäi Ephraim khaw gui kami im ah kami hteit ba khai nei. A u naw phi tuh mü kä na ih sak gui ci,

¹⁹ Cun ung phi keimi ung sela ah ei vai htang gong la kei la ka chu ni, ka changshäm ni ah ei vai, m’htut la sapyit tui om ci nei. Keimi ung hlü ci phung om ci nei” cik ci.

²⁰ A ghipa nu naw, “Ka im ah ka ning khü ci nei! Kei naw ka ning m’htei khai nei; nang khaw k’awng düt ung kä na ip khai nei” cik ci.

²¹ Ani naw a im ah hteh püi gui neta ami sela phi vuh ci. Akhin gui cu ami khaw m’si neta, ei ei tuk ci gui.

²² Ngami cu ami lüilawi tu yah ung cun ah gawnu ung htukhtik ciah chang gui cu, im veing u ne, shoh kauh ci gui. Ngami naw a ghipa nu am, “Na khah law püi ah chang cä, na pek gui ä! Ani awn kami ng’yaw hlük ci nei!” cik ci gui.

²³ Cun ung phi a ghipa nu cu lut law neta a pyen nak gui cu, “Ka nei, ka teihpüi gui aw! Nami bä ne! Shin ah mäih ah akshe, ng’zawpawn nak cu kä bi vä! Shin ah chang cu ka k’khin nei.

²⁴ Tengvä! Shin ung ani ah chuba la kei ah ka hnumi, ng’lamihta, kei naw ka ning thak law gui khai, nami yaw goi hning ci nei. Nami ng’yak hlü ah ngami awn om vä. Cun ung phi shin ah chang ung läi cun ah akshe kä be en vä!” cik ci.

²⁵ Cun ung phi cahng gui naw ani kä ngai ci gui. Cun ah kyasei Levit naw akchuba cu k’pung ah k’plawk ne pe gui ci. Ngami naw ani cu müpum pum yaw u ne, khaw thai khäta ng’düm ci gui.

²⁶ Khaw thaih ung hnumi cu law ba ne, aghipa ah m’kawt ung a cei ah pei ah kyu ne ng’yän ci. Ani cu khaw dei güt sei acun ung om ci.

²⁷ Khaw ngawi ah a cei tho law ne, pung ah hteit khai ah shoh hmawng neta, im hmai ah m’kawt ung a kut taih ne ng’yän sei akchuba cu hmuk ci.

²⁸ Ani naw, “Tho ä, Ni hteit kaw” cik ci. Cun ung phi ani naw kä m’shang ci. Cun ah kyasei ani naw akchu cu ng’sela ung taih ne, a im ah hteh püi ba ci.

²⁹ Im ah gawk ban eta im kyong ah lut ne khim va lak ci. Ani naw akchuba ah pumsa cu gha lei goi ah k’bou neta, Israel pakhui ghi lei goi ung tumat m’ta ät ciah pe gui ci.

³⁰ Acun hmu tuk ciah chang päng naw, “Shin ah mäih cu kä ng’yak tu man nei! Israel gui naw Egypt khaw hteh tak kawn ah shin ah mäih cu kä kia man ci nei! Shin ah a mawng ung mikmi naw a i bawta mi bik khai nei! A i mi bik khai ang?” cik ci gui.