SUKI GUI 18 - Cho Bible Common Language 2016

Mikah la Dan Pakhui

¹ Cun sang ung Israel gui ung ghangpughang kä om ci. Cun sang ung Dan pakhui gui cu khäm ne ami om nak vai ah khawpäng shui ci gui, a i ah kyasei ci ung Israel pakhui gui ung ka ngami cu ami ka vai khaw kä gah tu phak ci gui ah kyak ci.

² Cun ah kyasei Dan chang gui naw ami pakhui kyong chang gui ung bä ciah chang hma ghü u neta, Zorah la Esthaol gawnu gui ung ka khaw shui khai gui ah m’cäi ne tüi ci gui. Ngami cu Ephraim khaw-gui ung law u neta, Mikah ah im ung om tuk ci gui.

³ Ngami cu ah ami om tu yah ung, Levit chang nong a om hmat u neta, ani ah om nak ah hang kai ne, “Nang shih a i na bik ci ang? A u naw shi ah a ning law püi ang? cine ng’shik ci gui.

⁴ Ani naw, “Kei cu Mikah awn ka ning ge ci nei, ani ah taigü ah ka kyak vai ah, ani naw cheng ne ana ghüh nei” cik ci.

⁵ Ngami naw ani am, “Keimi kami hteh nak ung m’khütnäng nak a om vai ah Khanpughi na ng’shi pe gui ä” cik ci gui.

⁶ Taigü naw, “Nangmi kä nami ng’ä vai. Shin ah nami hteh nak ah lam ung Bawipa naw ning tengkhen gui ci nei” cik ci.

⁷ Cun kawn ah chang hma cu k’täi ne hteit u ne, Laish gawnu ah gawk ci gui. Ngami naw chang gui cu Sidonian gui ah mäih ah phiawng gai ne om u sei, hmuk ci gui. Ngami cu dimdeeih ne, dinggei ciah chang ah kyak ci gui, a u awn a i phi kä ng’cuh ng’vah ci gui; ngami ung ami ng’yak hlü avan om ci. Ngami cu Sidonian gui awn ng’shawng ne om ci gui, a u awn phi a täng ah kä om ci gui.

⁸ Cun ah chang hma cu Zorah la Esthaol ah law ba u khäta, ami khaw chang gui naw, a i ami teng ah ng’shi gui ci gui.

⁹ Ngami naw, “Law vä, Laish mi tuk khai nei. Cun ah khaw cu kami hmuk ci, ang htei ah nik ci nei. A i kä bi ne shin ung kä om vä; yang law vä! hteit ne mi lak khai nei!

¹⁰ Nangmi cu ah nami gawk ah a kyak ung, chang gui cu a i phi kä ng’ä ai ne om u sei nami hmu gui khai nei. Cun cu khaw akdäm nei; Chang tumat ah ng’yak hlü phung vai cu, acun ung om ci nei, cun cu khanpughi naw ning pe gui ci nei.

¹¹ Cun ah kyasei Dan pakhui ung ka, chang phya chuk cu Zorah la Esthaol ung ka hteit ne, ng’tuk ge vai ah pawng ci gui.

¹² Ngami hang kai u ne, Judah khaw, Kiriath Jearim akhei ung phung tu ne om ci gui. Cun ah kiasei cun ah hmun cu Dan phung ah tü ä güt pyen ci gui.

¹³ Ngami cu cun ung ka hteit u ne, Ephraim khaw-gui Mikah im ung gawk ci gui.

¹⁴ Laish ah khaw vein gung khaw shui vai ah hteih ciah chang hma naw ami paw gui am, “Shiah im tumat mat ung, sing awn pyang ne, ngui awn vook ah a gup nami hmat ne ang? Cun kawn ah a hei a gup la khingzin phi om khai. Keimi naw a i kami bi ung bä khai ah nami ngai ne ang?” cik ci gui.

¹⁵ Cun ah kyasei ngami cu Levit chang ah om nak, Mikah ah im ah hteit u neta, a i cha a om mah Levit cu ng’shik ci gui.

¹⁶ Cun sang ung Dan ung ka gakap phya chuk cu, ng’tuk ge vai pawng ne, m’kawt pei ung ng’düi ci gui.

¹⁷ Taigü gui cu gakap phia chuk awn a täng ah m’kawt pei ung ami ng’düih yah ung Sübük chang hma cu im kyong ah k’täih ne law u ne, sing at ne ngui awn vook ne pyan ah a gup la a hei a gup gui, la khingyih cu lak ci gui.

¹⁸ Chang gui Mikah ah im kyong ah lut ne theingthap ci gui la u khäta, taigü naw, “A i ang nami bi?” cine ng’shi gui ci gui.

¹⁹ Ngami naw, “Düm ah om ä. M’kha ät ah phi kä ng’thu en ä. Keimi awn a täng ah law ne, nam shümthein gui ci la kami taigü ah kya ä. Chang tumat ah kyong khui ung taigü ah kyak ah ta, Israel pakhui avan ung taigü ah kyak cu bä pi ci nei” cik ci.

²⁰ Cun ah phäh ah taigü cu ang htei ah yeikyai neta, ani naw theingein ci gui cu la ne, ngami awn a täng ah hteit tuk ci.

²¹ Ngami cu ng’hlat ne, tün ne, ami hmaw gui ni, ami vuh chah gui ni, ami khaw gui ni ah ma ung theit ci gui.

²² Ngami cu Mikah ah im awn api shawng law u khäta, Mikah naw a im pei ah ka gui cu ng’tuk vai ah khü gui ci. Ngami naw Dan chang gui cu k’pha gui u neta,

²³ m’lau gui ci gui. Dan chang gui cu ng’hlat law u neta, Mikah cu ng’shik ci gui “A i ah ang a kiak” A i ah kyasei shin ah chang akhli ang?”

²⁴ Mikah naw, “A i nami pyen hlü ang? a i ah ang a kyak? Nangmi naw ka taigü la ka pyan ah khanpughi gui la ne nami hteit ci nei! Kei ung a i ang ak pawih ba” cik ci.

²⁵ Dan ung ka chang gui naw, “Shin ah chang gui m’lungshe u neta, ami ning tuk law gui vai, kä nami m’hni ah a kyak ung thu a i phi kä pyen ne nami om ung bä tu ba khai nei. Nang la na kyong chang gui nami sik khai nei” cik ci gui.

²⁶ Cun kawn ah ngami cu k’täi ne hteit ci gui. Mikah naw ngami cu gaigawng aih u sei hmu gui neta, ng’hlat ne a im hteit ba ci.

^27-28 Dan ung chang gui naw täigüpa la Mikah ah pyan gui ami lak dawn ah ngami naw hteit ne Laish cu tuk ci gui, cun cu dimdeeih ding gei ciah chang ah om nak ah kyak ci, Bethrehob ah om nak khaw ng’nawi bä ung om ci. Ngami naw chang gui cu ngawn gui u ne, gawnu phi m’khih ci gui. Ngami hun gui khai a u kä om ci, a i ah kyasei ci ung Laish cu Gidon awn ang lak shou ci, chang a hei a u awn phi kä hmu teng ci gui. Dan ung chang gui naw gaw sa ba u ne, acun ung om ci gui.

²⁹ Aming phi m’thawng u ne, Laish ungka naw Dan ah sui ci gui. Cun cu Jakob ah hta, ami pupa Dan ah ming ah kyak ci.

³⁰ Dan ung chang gui naw khawihnah vai ah a gup pyang ci gui, Moses ah tu, Kershom ah hta, Jonathan cu Dan pakhui ung taigü ah kya ne bik ci, ani ah hta ng’shon gui naw, ngami pha ne ami hteh püi gui güt ung taigü ah kia ne bi bik ci gui.

³¹ Shilon ung Khanpughi khawihnah nak ah phung a om ah chuih, Mikah ah a gup cu om lä ci.