SUKI GUI 17 - Cho Bible Common Language 2016

Mikhah ah Gup gui

¹ Hnü ät ung Mikah ming nak ciah chang tumat cu Ephraim khaw-gui ung om ci.

² Ani naw anu am,” Na ngui pit phia gha kei ät ami m’guk sang ung, nang naw m’guk ei cu na plah tam ci. Cun ah na bi cu kei naw ka ng’yak ci. Teng ä, cun ah ngui kei ung om ci nei, cun ah ngui lak cicu kei nei” cik ci. Anu naw, “Bawipa naw hriham ning pe sä, ka hta aw!” cik ci.

³ Ani naw cun ah gui ann am pe ba khäta, anu naw, “Ka tha ah khan ah kia lawk khai ah plah tam nak ang düm vai ah, kei ka mät naw shin ah ngui cu akni ah Bawipa am ka ap ci nei. Shin cu ngui awn kawt ne sing a gup pyan nak ung mang vai nei. Cun ah kyasei tuhbäi shin ah ngui cu nang am ka ning pe ba ci nei” cik ci.

⁴ Cun kawn ah ani naw cun gui cu anu am pe ba ci. Anu naw ngui pit goi la neta m’si-shep am pek sei, ani naw sing at ne a gup pyang ne, ngui awn vook ci. Cun cu Mikah ah im ung tha ci gui.

⁵ Cun ah chang Mika hung a khawihnah nak ah hmun om hnga ci. Ani naw a gup gui la khingzih cu pyang ne, ahapa tumat cu taigü ah m’düih ci.

⁶ Cun sang ung Israel ung ghangpughang kä om ci; a chang päng cu ami mät ah ngaih ah om ci gui.

⁷ Cun yah ung Judah khaw Bethlehem gawnu ung Levit chang nong tumat om ci.

⁸ Ani naw Bethlem cu nawng shut ne a om nak vai shui ci. Ani cu lam a hteh sangung Ephraim khaw-gui, Mika him ung gawk lawk ci.

⁹ Mikah naw, “A hawi ka na lawk ci ang? cine ng’shik ci. Ani naw, “Kei cu Judah khaw Bethlehem ung ka Levit chang nei. Kei cu ka om nak vai ka shui ci nei” cik ci.

¹⁰ Mikah naw, “Kei awn a täng ah om ä. Kei na m’shümthein ci la taigü ah na kyak khai, khaw kum ät ung ngui pit gha la suisak ni, ei awk ni ka ning pek khai.

¹¹ Levit chang nong cu Micah awn ani om vai yum ne om tu neta, a hta ah mäih ah kya lawk ci.

¹² Mikah naw ani cu ak taigü ah m’düih sei, ani cu Mikah ah im ung om ci.

¹³ Mikah naw, “Tuhbäi kei ung Levit chang ka k’taigü om ci, Bawipa naw a päng avan ung m’khütnäng nak na pek khai ciah ka hmat ci” cik ci.