SUKI GUI 16 - Cho Bible Common Language 2016

Kaza ung Samson

¹ Hnüüp ät ung Samson cu Philistin mang gaw Kaza ah hteit ci, acu ah pawnzau ciah hnumi awn ng’hmu ni ne a täng ah ip ci goi.

² Kaza ung chang gui naw Samson a om cu hmu u neta, a om nak ah hmun cu koi u ne, mang gaw m’kawt ung amü pum ngäng ci gui. Ngami cu a mü pum adüm ah om ci gui, ami mät naw ngai u ne, “Mikmi naw khaw a thaih güt mi ngäng khai, cun kawn ah ani cu mi ngawn khai” cik ci gui.

³ Cun ung phi Samson cu khaw cawih güt bang cun ung ip tuk ci. Ani tho law ne mang gaw m’kawt cu mawi ne, gäi neta, Shoh ni, Shohpang ni, Shohgaw ni avan ak phleing am kawt ne, Hebron m’htung lai ung hteh püi ci.

Samson la Delilah

⁴ Cun kawn ah Samson cu Sorek khawnawi ah om ciah hnumi Delilah awn ng’zum hni tuk ci goi.

⁵ Philistin ghangpughang hma gui cu, cun ah hnumi ah law u neta, “Samson cu theileh ne na ng’shi vai, ani a i ah kya ne ak thamah aih, keimi naw a i cha ah kami m’khüt khai, a i cha ah khit ne, am gein ka ah kyak khai ah kami ci thei khai, cun na hmat ung chang tumat naw ngui pit phia gha lei ät ci, kami ning pek khai” cik ci gui.

⁶ Cun ah kyasei Delilah naw Samson am, “Na bä ni, nam thein ä, a in aw ang shin hlawk ah a ning k’thamah sak. A vaisü ah chang naw pha ne a ning khih hlüng ung am gein ka ah a ning ci hlü ung, a i hawk cha ah bik khai gui ang?” cine ng’shik ci.

⁷ Samson naw, “Kä hu phak ciah liza akthai chih awn ami na khih ah a kyak läi ung, kei phi a hei chang gui ah mäih ah ka k’tha ken khai nei” cik ci.

⁸ Cun ah kyasei Philistin ghangpughang gui naw kä hu phak ciah liza akthai chih cu Delilah am thak law u sei, ani naw Samson cu khit ci.

⁹ Ani naw akhan a hei ung chang am ngäng sak gui neta, “Samson! Philistin gui lawk ci gui nei!” cine m’lau ci. Cun ung phi Samson naw, mei ah uih ah bigui pyai ah mäih ah cun ah gui, gui cu kai pit pit ci. Cun ah kia ne ani ah k’thamah nak cu kä cu kä hmat hlawt ci gui.

¹⁰ Delilah naw Samson am, “Teng ä! nang naw kei cu ak gu ah nana pyang ci nei, akcang kä na na m’thein ci. Na bä ni, na m’thein ä, a i hawk cha ah chang naw ning khit hlawt khai ang” pyen nak ci.

¹¹ Ani naw, “Ka bi en man ah gui akthai awn ami na khih ah a kyak ung kei phi chang a hei gui ah mäih ah ka k’tha ken khai nei” cik ci.

¹² Cun ah kyasei Delilah naw gui akthai la neta khit ci. Cun kawn ah ani naw, “Samson! Philistin gui lawk ci gui nei!” cik ci. Ahei akhan ah ka naw chang gui naw mah ci gui. Cun ung phi a kut ung gui gui cu bigui ah mäih ah kaih pit yawp ci.

¹³ Delilah naw Samson am, “Nang naw kei cu ak gu ah na na pyang ci nei, akcang kä na na m’thein ci. Na m’thein ä, a i hawk cha ah chang naw ning khit hning khai ang? cik ci. Ani naw, “Nang naw na tah ung ka lusam ma chih cu la ne tah awn na tah shi ah a kyak ung, chang a hei gui ah mäih ah ka tha ken khai ne” cik ci.

¹⁴ Delilah naw ani cu m’äp ne ih sak neta, a lusam chih lak pe ne, tah awn tah shi ci. Ani naw htek khai ah tah shin eta, “Samson! Philistin gui lawk ci gui nei” cine m’lau ci. Cun ung ani cu tho law netah, tah im ung ka a lusam cu mawi hlit ci.

¹⁵ Cun ah kyasei hnumi naw ani am, “A i hawkcha ah kä nam hni lang ne, na na m’hni ciah na pyen ang? Nang naw thum vei akgu ah na na pyang ci, tuhgüt a i naw thamah nak a ning pek cu kä na na m’thein ci” cik ci.

¹⁶ Ani naw ak hnüüp tä acun ah ng’shi laih laih ci. Cun ah hnumi naw ngnaksou na aih sei ani cu yaica lawk neta akhnu ah akcang cu m’thein ci.

¹⁷ Ani naw, “Ka lu cu kä ka k’teiu man nei. Kei cu ami na hta nak ge ung Khanpughi am Nazirit ah ka kyak khai ah ami na ap pyi nei. Kalu k’teiu ah a kyak läi ung, kei cu ka thagui mäih sei, chang hei gui ah mäih ah ka k’tha ken khai ne” cik ci.

¹⁸ Delilah naw, ani naw akcang am thein cu hmat neta, ani naw chang gui tüi ne, Philistin ghangpughang gui a pyen nak gui cu, “Hnü ät law ba mä vä, ani naw akcang na m’thein ci nei.” Cun kawn ah ngami cu law u ne, ani am ngui thak law ci gui.

¹⁹ Delilah naw Samson cu a pheitui khan ah m’äp ne m’ih neta, Samson ah a lusam säm chih cu at khai ah chang cu khü ne ah sak ci. Ani ah akthagui cu maih pyi ci kyasei, hnumi naw tün ne shedam nak ci.

²⁰ Cun kawn ah ani naw, “Samson! Philistin gui lawk ci gui nei” cine m’lau ci. Ani cu tho law neta, ngaih-tüh ci, “A yanä ah mäih ah tubäi phi luat ne ka hteit khai” Ani naw Bawipa naw a hteh tak cu kä hmat ci.

²¹ Philistin gui naw ani cu pha u neta amik cu kawih ci gui. Cun kawn ah kaza ah hteh püi u ne, kyei gui awn khit u neta, thawng im kyong ah gawtlung gawt sak ci gui.

²² Cun ung phi a lumu cu sei law ba ci.

Samson Asih ah mawng

²³ Philistin ghangpughang gui cu a täng ah ng’hmu u neta, ami khanpughi Dakon am dämduh ciah khawihnah nak douthak vai ah k’bäi ci gui. Ngami cu, “Kami khanpughi naw kami ga Samson ah khan ah näng ank na pe gui ci nei!” cine ng’äi ci gui.

^24-25 Ngami ami mät yeikyai neta ng’thu ami pyen cu, “Samson khü vä, ani naw ana khin nak gui vai ah mi bi sak khai nei! cik ci gui. Ngami naw Samson cu thawng ung ka k’plawk ne law püi neta, ngami khin na gui khai ah ci u ne, k’tung gui ah ng’lak ung ng’düih sak ci gui. Ani cu chang gui naw hmu u neta, ami khanpughi m’tam ne ng’äi u ne,” kami khanpughi naw kami khaw m’di ne kami chang akda ngawn ciah kami ga ah khan ah näng nak na pe gui ci nei! cik ci gui.

²⁶ Samson naw a kut ung k’pang ne law püi ciah ak hmaw am, “Im ung ng’lin ah k’tung gui cu na tawn sak ä, cun ung ka hngang hlük ci nei” cik ci.

²⁷ Cun ah im ung pami ni, hnumi ni chang hli be ci. Philistin ghangpughang hma, ami van cun ung om ci gui, hnumi, pami chang phia thum kip vai im khan ah om ne, Samson naw akhin nak gui cu teng ci gui.

²⁸ Cun kawn ah Samson cu k’taigü ne, “Bämang ciah Bawipa, nab ä ni, na shüm ba ä, ami na kawih ah phäh ah, Philistin gui ah khan ah hnü ät phu ka tuk nak vai ah, hnü ät hta bang thamah nak na pe ba ä” cik ci.

²⁹ Cun kawn ah Samson naw ang lung ung im tung hnih cu k’pang ci. Akut vangtäng awn tung tumat ci k’pang neta, ngami täng ah hei buh ne,

³⁰ “Philistin gu awn na sih sak ä!” cine m’lau ci. Ani naw aktha gui avan awn ng’läh ne buh khäta, im cu ng’gäi ne, ghangpughang hma la chang päng ah khan ah kia lawk ci. Samson naw a ghin yah ung a ngawn ah da pi khai ah, a sih law vai ung chang gui ngawn gui ci.

³¹ A phäi nau gui la akyong chang gui law u ne, a gook cu la ba ci gui. Ngami naw hteh püi ba u ne Zorah ah ng’lak la Esthaol, apa ng’phuh hmun ung k’phuh ci gui. Ani cu khawkum m’ku ung Israel gui ah ng’vai ah kyak ci.