SUKI GUI 15 - Cho Bible Common Language 2016

¹ Akhin shou law khäta, htang khäm yah ung Samson cu akchu ah om tuk khai ah law ne, mahta thak law ci. Ani ah akchu ah pa am, “Ka chu ah im kyong ah ka hteit hlük ci nei” cik ci. Cun ung phi ani naw kä hteh sak ci.

² Ani naw Samson am, “Ani na gen ciah kei naw akcang ah ka ngai ci, cun ah kyasei ani cu na teipüi am ka pek nei. Cun ung phi ani ah anau cu kiom pi ci nei, a i ah a kiakung phi, nang naw chu nab a hning ci nei” cik ci.

³ Samson naw, “Tuhbäi ung läi Philistin gui ah khan ah kei naw ka bi cu, kei naw kä ka k’chaw nak khai nei” cik ci.

⁴ Cun ah kyasei ani naw hteit ne saui phia thum phat ci. Cun gui cu hnih ciah ami ng’mei guikhit ne hlin neta, cun ah hlin ung mei m’htai tha ci.

⁵ Cun kawn ah mei m’htai gui cu mei awn m’däi neta, Philistin gui ah ami htang lo ung saui gui cu m’hlat ne chah gui ci. Ani naw, at ne ami phlin ah htang büng ah kä kyak ci, kä ami ah pha lo ung htang gui la Olive geit gui phi m’khih gui ci.

⁶ Philistin gui naw, a u naw shin ah abi cu ng’shi gui u neta, Samson naw a ciah hmat ci gui, a i ah kyasei ci ung, Timnah ah ka Samson ah kawi naw, Samson ah akchu cu, Samson ah a teihpui am a pek ah hmawk ah kyak ci. Cun ah kyasei Philistin gui naw cun ah hnumi m’khih u ne apa ah im phi m’khih ci gui.

⁷ Samson naw a pyen nak gui ci, “Nangmi naw shin cha ah nami bi ah a kyak ung, kei phi nangmi kä ka ning thung pha gui yawp ah chuih kä ka ng’düm khai nei cine ka ng’tam ci nei” cik ci.

⁸ Ani naw ak nui ah tu gui ne, akda ngawn gu ci. Cun kawn ah ani cu hteit ne Etam lungsheng khui ung hteit ne om ci.

Samson naw Philistin gui Hnim gui ci

⁹ Philistin gui law u ne Judah ung phung tu ne om u ne, Lehi gawnu cu tuk ci gui.

¹⁰ Judah chang gui naw ng’shi gui u ne, “A i ah kyasei keimi cu nami na tuk gui ang?” cik ci gui. Ngami naw, “Samson pha ne thawng ung chum nea, ana ci gui ah mäih ah kami cit u ba khai ah kami lawk ci nei” cik ba ci gui.

¹¹ Cun kawn ah Judah chang gui phia thum kip cu Etam lungsheng khui ung hteit u neta, Samson am, “Philistin gui cu keimi ah uktu ah ami kyak cu kä na hmat ci ma? Keimi ah khan ah nang naw a i ang na bi? cik ci gui. Ani naw, “Ngami naw kei ah khan ah ami bi ah mäih ah ami khan ah ka bi tu ba nei” cik ci.

¹² Ngami naw, “Nang kami ning khit khai ah shin ung kami lawk ci nei, cun kawn ah ngami am kami ning ap khai nei” cik ci gui. Samson naw, “Nami mät naw kä nami na ngawn vai ah mawng thumkhän na pe vä” cik ci.

¹³ Ngami naw, “Ä, keimi naw nang cu kami ning khit bang khai, cun kawn ah ngami am kami ning ap khai, kä kami ning ngawn khai” cik ci gui. Cun kawn ah ani cu gui ak thai hnih awn khit u neta, lungsheng ung ka law püi ba ci gui.

¹⁴ Ani cu Lehi ung gawk law khäta, Philistin gui cu ani täng ah dawng law u ne, ani cu m’lau ci gui. Ang ghit ah Bawipa ah huham naw ani cu k’thamah nak pe sei, aban, a kut ung ami khih nak ah gui, gui cu mei ah uih ah pyai hta mäih ah kaih pit yawp ci.

¹⁵ Cun kawn ah ani naw kä a shou pha ung sik ciah sela ah am kha guh cu hmu neta, kawp ne yuk la neta, acun am chang phia gha ngawn gui ci.

¹⁶ Cun ah kyasei Samson ah ng’äi cu, “Ng’sela ah m’kha guh awn kei naw chang phia gha ka ngawn ci nei; Ng’sela ah m’kha guh awn kei naw plum ne ka plum gui ci nei.”

¹⁷ Cun kawn ah, ani naw ng’sela ah m’kha guh cu ghawt ci. Acun ah a kyak nak ah hmun cu Ramath Lehia ah sui ci gui.

¹⁸ Cun kawn ah Samson cu ang’hei ah tui gha neta, ani naw Bawipa khü ne a pyen cu, “Nang naw shin ah dämduh ciah näng nak na na pek ci, kei tuhbäi tui ghane ka si lawk khai ne, Khanpughi kä yum ciah shin ah Philistin gui naw nap ha lawk khai gui nei?” cik ci.

¹⁹ Cun kawn ah Khanpughi naw Lehi khomdek ung m’dek yuk hmawng khäta, acun ung tui lut lawk ci. Samson naw cun cu aw neta acun ung gai law ba ci. Cun ah kiasei cun ah tui cu Hakkore ah sui ci gui, cun cu tu ä Lehi ung om ci.

²⁰ Philistin gui naw cun ah khaw ami uk sang ung Samson naw Israel gui khawkhum ku ung matawn gui ci.