SUKI GUI 12 - Cho Bible Common Language 2016

Jephthah la Ephraimit gui

¹ Ephraim chang gui cu ng’tuk vai ah pawng m’htei ci gui; ngami cu Jordan tuinu kat ne, Zaphon ung gawk u neta Jephtha ami pyen nak cu, “A i ah kyasei a täng ah keimi kä na khü gui ah khawgi kan ne Ammonit gui tuk gui vai ah na hteh ang? Keimi naw nang la na im cu mei awn kami m’khih khai nei! cik ci gui.

² Jephthah naw ngami am, “Kei la ka chang gui cu Ammonit gui awn atung ah kami ng’tu ng’aat ci nei. Kei naw ka ning khü gui ci, cun ung phih nangmi naw kä nami na gung gui ci.

³ Nangmi kä nami hteit tuk khai ah hmu neta, kei naw ka hnun gui pe ne, khawgi khum ne ka tu gui ci, Bawipa naw ngami ah khan ah näng nak na pek ci. Cun ah kya lang sei, a i ah kyasei, tuhbäi, nangmi naw law ne, nami na tuk lawi ang?” cik ci.

⁴ Cun kawn ung Jephthah naw Kilead chang gui avan law püi gui ne, Ephraim gui cu tu ne hnim gui ci. (Ephraim gui naw pyen u ne, “Ephraim la Manasseh khaw ung, nangmi Kileadit gui cu Ephraim ung ka chang dawng gui nei!” cik ci gui.)

⁵ Ephraimit gui kä phyawng khai gui ah k’pan nak gui vai ah Kileadit gui naw Jordan tuinu kah nak ah hmun cu khäm ci gui. Ephraimit tumat mat naw, a phyawn vai ah k’tha na ne, tui kat khai ah ak thäh law ah a kyak ung, Kilead chang gui naw ami ng’shi vai, “Nang cu Ephraimit ang?” Ani naw “Ka nei,” a ciah a kyak ung,

⁶ Ngami naw, “Shibboleth” ciah ng’thu a pyen vai ah m’thein ci gui. Cun ung phi ani naw, “Sibboleth” a ci law ah a kyak ung ani naw hman khai thu k’aw kä pyen thei ciah kyak ci. Cun gui cu pha u neta, Jordon tui kah nak ah hmun ung ngawn ci gui. Acun ung Ephraimit phia phli-kip lei-goi cu ngawn ci gui.

⁷ Jephthah naw Israel gui cu kum chuk ung matawn gui ci. Cun kawn ah ani cu si sei, amät ah gawnu, Kilead khaw ung m’cim ci gui.

Ibzam, Elon la Abdon

⁸ Jephthah asih kawn ah Bethlehem ung ka Ibzam naw Israel gui cu matawn gui ci.

⁹ Ani ung a hta pami thum kip la a hta hnumi thum kip om ci. Ani naw a hta hnumi gui cu apa hei cei na sak gui ci, a hta gui naw ami chu nak vai ah apa hei ung ka hnumi hta htum kip lak pe gui ci. Ibzam naw Israel gui cu kum chih ung matawn gui ci,

¹⁰ Cun kawn ah ani cu si sei, Bethlehem ung m’cim ci gui.

¹¹ Ibzam kawn ah Zebulun ah ka Elon naw Israel gui cu kum gha ung matawn gui ci.

¹² Cun kawn ah ani cu si sei, Zebulun khawpäng Aijalon ung m’cim ci gui.

¹³ Elon kawn ah Pirathon ung ka Hillela ah hta Abdon naw Israel gui cu matawn gui ci.

¹⁴ Ani ung a htapa phli kip la a hta ah hta thum kip om ci, ngami cu ng’sela chih kiip ung ng’cum ci gui. Abdon naw Israel gui cu kum cheit ung matawn gui ci,

¹⁵ Cun kawn ah ani cu si sei Amalekit khaw gui, Ephraim khawpäng, Pirathaon ung m’cim ci gui.