SUKI GUI 11 - Cho Bible Common Language 2016

¹ Jephthah, phet ciah gakap cu Kilead ah ka, pawnza ciah hnumi ah hta ah kya ci. Apa Kilead ung

² a hei ak chu awn ani htapa gui om ci, ngami ng’vai law u neta, Jephthah cu im ungka naw k’täm ci gui. Ngami naw ani am, “Nang cu pa ah pakhui kä na m’düung tuk khai; a hei hnumi ah ning hta ah na kyak ci” ci nak ci gui.

³ Jephtha cu a phäinau gui dawng ta gui ne, Toba khaw ah hteit ne om ci. Acu ah kä chu ciah chang gui naw yeikyai na u ne, a hnu ah läk ci gui.

⁴ Api shou hta khäta Ammonit gui naw Israel gui cu ng’tuk püi gui ci gui.

⁵ Cun ah kya law khäta, Kilead ung ami ng’vai gui naw Jephthah cu Toba khaw ah ka, law ne la law ba ci gui.

⁶ Ngami naw, “Law ne, keimi ma na tawn gui ä, cun ung keimi naw Ammonit gui cu tu ne kami m’khüt gui khai nei” cik ci gui.

⁷ Cun ung Jephtha naw, “Nangmi naw kei cu na gen aih u ne, kapa ah im ka hteh taak vai ah nami na k’täm ci, A i ah kyasei tuhbäi khüikha nak ung gawk law u neta, kei ah nami law ang?” cik ci.

⁸ Ngami naw Jephthah am, “Keimi tuhbäi nang ah kami ng’hlat lawk ci nei, nang cu keimi awn a täng ah heit ne, Ammonit gui tu gui ne, Keliad chang gui avan ma natawn vai ah kami ng’ya hlük ci nei,” cik ci gui.

⁹ Jephthah naw ngami am, “Nangmi naw kei cu im ah na hteh püi ba uk ci sei, Ammonit gui tu ne, Bawipa naw näng nak ana pek ah a kyak ung, kei cu nangmi ah uktu ah ka kyak khai nei” cik ci.

¹⁰ Ngami naw, “Kami yum ci nei, Bawipa cu kami saksi nei” cik ci gui.

¹¹ Cun ah kyasei Jephthah cu Kilead ang vai gui awn a täng ah hteit tu sei, chang gui naw ami uktu la ami ng’vai ah k’hmoh ci gui. Jephthah naw ak thäh gui ah mawng cu Mizpah ung Bawipa ah ma pyen ci.

¹² Cun kawn ah Jephthah naw Ammon ghangpughang am chang tüi ne a pyen cu, “A i ang kei mi awn mi ng’cuh vai a om? A i ah kyasei kei ah khawpäng na phlän law ang?”

¹³ Ammon ghangpughang naw Jephthah ah chang tüih am shan nak cu, “Israel chang gui Egypt khaw ah ka law ba u ne, ngami naw tuinu Arnon ungka naw tuinu Jabbok la tuinu Jordan ung khüt sei kei ah khaw cu lak ci gui nei. Tuhbäi cun cu ak ding gei ah nami na pek ba khai nei,” cik ci.

¹⁴ Jephthah naw ghangpughang Ammon ah chang gui tüi bam ä ne

¹⁵ Shin cha ah ng’thu m’shang ba ci; “Moab khaw, käcung Ammon khaw cu Israel gui naw ami lak cicu kä hman ci nei.

¹⁶ Shin ah a mawng cu; Israel gui naw Egypt khaw ung ka ami law ba yah ung bungpuk kan u ne Akaba tui ng’khep täng ah Kadesh ung gawk ci gui.

¹⁷ Ngami naw Edom ghangpughang ah chang tüi u ne, a khaw ami kan tu vai ah k’thäh ci gui. Cun ung phi Edom ghangpughang naw kä kan sak gui ci. Ngami naw Moab ghangpughang phi kthah ci gui, cun ung phi ani naw phi a khaw kä kan sak gui ci. Cun ah kiasei Israel gui cu Kadesh ung om ci gui.

¹⁸ Cun ah kyasei ngami cu bungpuk kan ne, Edom khaw la Moab khaw cu veing ne lek ne, Moab khaw ah a kiangtäng Arnon tuinu ah vang ga täng gawk ci gui. Ngami acun ung phung tu ne om ci gui, cun ung phi Arnon tuinu cu Moab khaw ah khawgi ah kyasei kä kat ci gui.

¹⁹ Cun kawn ah Israel gui naw ami mä ah khaw ung ami hteh ba täng ah, a khaw ami kan tu vai ah Heshbon ung, Amorit ghangpughang Sihon am chang tüi ne k’täh ci gui.

²⁰ Cun ung phi Sihon naw Israel gui am kä kan tu sak gui ci. Ani naw a gakap avan a täng ah law püi gui ne, Jahaz ung phung tu ne om neta, Israel gui cu tu gui ci.

²¹ Cun ung phi Bawipa, Israel gui ah Khanpughi naw Sihon la a gakap gui ah khan ah näng nak cu Israel gui am pe gui ci. Cun ah kyasei Israel gui naw cun ah khaw ung om ciah Amorit gui ah khawpäng avan cu la yawp ci gui.

²² Ngami naw Amorit khawpäng avan cu tu khäm u ne, a htumtäng Arnon ungka naw a siiptäng Jabbok ung khüt sei, a kiangtäng bungpuk ungka naw akhei täng Jordan ung khüt sei lak ci gui.

²³ Cun ah kyasei, a chang gui Israel gui ah hmawk ah Amorit gui k’täm gui ci cu, Bawipa, Israel gui ah Khanpughi nei.

²⁴ Nang naw cun cu na lak ba vai ah nak tha nak khan ma? Na khanpughi Chemosh naw a ning pek phung cu nang naw na k’pang hning ci nei. Keimi phi Bawipa kami Khanpughi naw ana pek gui phung cu kami k’pang khai nei.

²⁵ Nang cu Zippora ah hta Balak, Moab ghangpughang ah tan a bä pi ciah na ngai ne ma? Ani naw keimi na hnung’tuk püi gui ne ng’tuk bi man ne ang?

²⁶ Heshbon la Aroer la ani pei zung ah ka gawnu gui ni, Arnon tuinu kem zung ah mang gaw gui avan cu Israel gui naw kum phia thum ung khäm ne uk ci gui. A i ah kyasei tuh güt kä na khäm ba ang?

²⁷ Kei naw nang an khan ah katnak kä ka bik ci. Nang naw na ng’tuk püi ne katnak na bik ci nei. Bawipa cu suki ah kyak ci. Tuhngawi ani naw Israel gui la Ammonit gui ang ng’lak ung m’khoicha bik khai nei,” cik ci.

²⁸ Cun ung phi Ammon ghangpughang naw Jephthah ah ng’thu m’shäk cu a i ah phi kä m’hlam ci.

²⁹ Cun kawn ah Bawipa ah Mumcha cu, Jephthah ah khan ah gawk lawk ci. Ani cu Kilead la Manasseh zung ah hteit neta, ng’hlat ne Kilead khaw Mizpah ung lawk ci, cun ungka naw Ammon ung hteit ba ci.

³⁰ Jephthah naw Bawipa ah shai a tak cu: “Nang naw Ammonit gui ah khan ah näng nak na na pek ah a kyak ung,

³¹ Kei na hmuk khai ah ka im ah law htük bäih ciah chang cu m’khih ne douthak nak ah ka ning pek khai nei. Kei näng nak awn ka law ba ah a kyak ung, kei naw cun ah chang cu khawihnah nak ah ka ning douthak khai nei” cik ci.

³² Jephthah naw Ammonit gui tu gui khai ah tuinu hei kat sei, Bawipa naw näng nak pek ci.

³³ Ani naw Aroer ungka naw Minnith area avan, mang gaw m’ku, Abel Keramim ung khüt ne tu ne dep gui ci. Aknui ah ngawn sih nak om, Ammonit gui cu Israel gui naw tu hnim gui ci gui.

Jephthah ah Htahnumi

³⁴ Jephthah cu Mizpah a im ah law ba khäta, ahtahnumi cu ani hmu lawk khai ah thing tum ne ng’lam ne lawk ci. Ani cu a hta tumat bang ah kyak ci.

³⁵ Ani naw cun ah hnumi hta cu hmu neta, thüi ne, a sui k’teek neta a pyen cu, “Oh, ka hta hnumi! Nang naw ka m’lung msin na na nat sak ci nei! Kei ah m’lung na nat sak cicu a i ah kyasei, nang ah a kyak ang? Kei naw Bawipa ung a küi ah thu ka khan pyi ci nei, kei naw kä ka k’pyai ba hlawt khai nei! cik ci.

³⁶ Hnumi hta naw ani am, “Nang naw Bawipa ung ah shai na tak pyi ah a kyak ung, kei ah khan ung na bi bai ah na pyen cu na bi bai nei, Bawipa naw nag a gui Ammonit gui ah khan ah phu-tuk nak vai ning pe pyi ci nie.”

³⁷ Cun ung phi ani naw apa cu k’thaäh ci “Shin ah tumat cu kei ah hmawk ah na bi pe ä. Kei cu hnumi hta ah kia ne, khomhtung zung ah hteit shüi ne ka kyah m’lau nak vai ah cha goi ung kamät na nawng ä” cik ci.

³⁸ Ani naw pyen na ne, cha goi ung a hei ah a hteh vai ah tüi ci. Ani la a teihpüi gui cu khomhtung ah hang kai u neta, kyap m’lau ci gui, a i ah kyasei ci ung ani cu kä ceimak ne, kä htanau ne si lawk khai ah a kyak ah phäh ah kyak ci.

³⁹ Cha goi a lung kawn ah ani cu apa ah law ba ci. Ani naw Bawipa ung a shaitak ah mäih ah bi sei, hnumi hta cu lami ne sik ci. Shin cu Israel gui ah thungzo a phung ah kyak ci,

⁴⁰ Cun ah kyasei hnumi hta gui cu Kilead ah ka, Jephthah ah hta hnumi ah phäh ah, a kum tä sei, hnüüp phli ci, a hei ah hteit ne kyap m’lau ci gui.