SUKI GUI 10 - Cho Bible Common Language 2016

Tola

¹ Abimelek asih kawn ah Dodo ah tu, Puah ah hta, Tola om law ne Israel gui cu hun gui ci. Ani cu Issakha pakhui ung ka ah kia ne, Ephraim khaw-gui Shamiza ung om ci.

² Ani cu khawkum m’kulei-thum ung Israel gui ah ang vai ah kyak ci. Cun kawn ah ani cu si sei, Shamiza ung m’cim ci gui.

Jaira

³ Tola kawn ah Kilead ah ka Jaira gawk lawk ci. Ani naw Israel gui cu kum m’kulei-goi ung khawngmang gui ci.

⁴ Ani ung a hta thum-kip om ci, ngami cu ng’sela thumkip ng’cum ci gui. Ngami naw Kilead khaw ung mang gaw thum-kip uk ci gui, cun gui cu tuh güt Jaira pigaw gui ah pyen ci gui.

⁵ Jaira cu sih sei Kamon ung m’cim ci gui.

Jephthah

⁶ Israel gui naw Baala la Astarte gui khawihnah u ne, Bawipa cu hnung’tuk püi ne cheishoh ba ci gui, ngami naw Siria, Sidon, Moab, Ammon la Philistia gui ah khanpughi gui phi khawihnah ci gui. Ngami naw Bawipa cu nawng ne, kä khawihnah ba ci gui.

⁷ Cun ah kyasei Bawipa cu Israel gui ah khaw ah m’lungshe neta, Philistin gui la Ammonit gui am tu ne khäm sak gui ci.

⁸ Kilead khaw Jordan tuinu ah a kiangtäng Amorit khopäng ung om ciah Israel gui ami van cu khokum ghalei-cheit ung ngami naw zoshe na ne, k’dukdeiu na gui ci gui.

⁹ Ammonit gui naw Jordan tuinu hnraw kat law u ne Juda, Benjamin la Ephraim pakhui gui cu tu lawk ci gui. Cun ah kyasei Israel gui cu ang htei ah khüikha ci gui.

¹⁰ Cun kawn ah Israel gui naw kyap m’lau u ne, Bawipa ung thu ami pyen cu, “Keimi naw nang ning hnung’tuk püine kami shekak ci nei, Kami Khanpughi nang ning nawng ne, Baala kami khawihnah ci nei” cik ci gui.

¹¹ Bawipa naw shincha ah m’shang gui ci, “Egypt gui, Amorit gui, Ammonit gui, Philistin gui,

¹² Sidonian gui, Amalekit gui la Maonit gui naw cau ning yawshe na gui sei, nangmi kei ah nami kyap m’lau ci. Cun ung kei naw kä ka ning hun gui ciah kya ne ang?

¹³ Cun ung phi nangmi naw kei na nawng ne, a hei khanpughi gui nami khawihnah ci, cun ah kiasei kei naw kä ka ning gung ba gui khai.

¹⁴ Nami mät naw nami ghü gui ah khanpughi gui ah hteit ne kyap m’lau vä. Nangmi yaica nak ung nami gawk law ung acun gui naw ning gung gui u sä” pyen na gui ci.

¹⁵ Cun ung phi Israel gui naw Bawipa ah ma ah, “Keimi kami shekak ci nei. Na m’hni ah na ci gui ä, cun ung phi tuhngawi, na bä ni, nah un gui ä” cik ci gui.

¹⁶ Cun ah kyasei ngami naw akcho hei khanpughi gui cu nawng u ne, Bawipa cu khawihnah ci gui; cun ah kyasei, ngami ah khüikha nak cu chihna gui ci.

¹⁷ Cun yah ung Ammonit gakap gui cu ng’tuk vai ah pawng u ne, Kilead ung phung tu ne om ci gui. Israel chang gui cu ng’bum ne law u ne, Kilead khaw Mizpah ung phung tu ne om ci gui.

¹⁸ A cu ah chang gui la Israel pakhui gui ung ami ng’vai gui cu ami mät ng’thu u ne, “Ammonit gui awn ng’tuk law ung a u naw matawn khai ang? Matawn ciah chang cu Kilead khaw ung changpäng ah ng’vai ah kyak khai nei” cik ci gui.