SUKI GUI 1 - Cho Bible Common Language 2016

¹ Joshua asih kawn ah Israel chang gui naw Bawipa cu ng’shi u ne, “A u keimi pakhui naw hteit ma ne Kanaanit gui cu tu gui khai ang?”

² Bawipa naw m’shang gui ne, “Judah pakhui hteit ma sä, kei naw khaw ami m’khüt nak vai ka pe gui ci nei” cik ci.

³ Judah chang gui naw Simeon chang gui am, “Ami na pek guiah khawpäng ah kyong ah keimi awn a tang ah hteit tu vä, Kanaanit gui cu mi tu ghawm khai nei. Cun kawn ah nangmi am ami ning pek gui ah khawpäng ung keimi phi nangmi awn a täng ah kami hteit tu ba khai nei. Cun ah kyasei Simeon Pakhui la Judah gui cu ng’tuk vai ah a täng ah hteit ci gui.

⁴ BAWIPA naw Kanaanit gui la Perizzit gui ah khan ah näng nak pe gui sei, ngami naw Bezek chang phia phya ngawn ci gui.

⁵ A cu ah ngami naw Adonibezek cu hmu u neta tuk ci gui.

⁶ Ani cu dawng ci, cun ung phi gawt u ne, pha u ne, akutnu la a khawnu gui cu m’chün ci gui.

⁷ Adonibezek naw, “ghangpughang chih kip, ami kutnu la ami khawnu ka m’chün gui cu, ka tawnglang ka ah ei k’bok kawk ne om ci gui nei. Ngami ah khan ah kei naw ka bi ah mäih ah kei ah khan ah khanpughi naw tuhbäi bik ci nei,” cik ci. Ani cu Jerusalem ah hteh püi u sei a cu ah sik ci.

Judah Pakhui naw Jerusalem la Hebron khäm ci gui

⁸ Judah chang gui naw Jerusalem cu tu u ne, khäm ci gui. Ngami naw cun ung chang gui ngawn gui ne, mang gaw phi mei awn m’khih ci gui.

⁹ Cun kawn ah khaw-gui zung ah om ciah Kanaanit gui, m’htung kem la a htum täng khaw goi ung ngami naw hteit ne tuk ci gui.

¹⁰ Ngami naw Hebron mang gaw ung om ciah Kanaanit gui cu hnu ng’tuk püi ne hteit ci gui, cun cu Kiriath Arba ah khü ci gui. A cu ah Sheshai, Ahiman, la Talmal pahta gui cu ngami naw hnim ci gui.

Othniela naw Debira mang gaw näng ci

¹¹ Cun ungka naw Judah gui cu Debira mang gaw hnu ng’tuk püi ne hteit ci gui, cun yah ung Kiriath sepher ah ami pyen.

¹² Ngami ung ka tumat kaleb naw a pyen cu, “Kiriath Sepher tu ne näng ciah chang am ka hta hnumi Achsah cu ka chu na sak khai.”

¹³ Othniela, Kaleb ah nau Kenaz ah hta naw mang gaw cu tu ne näng sei, Kaleb naw a hta hnumi Achsah cu akchu nak vai ah pek ci.

¹⁴ Ani ng’puikhah hnüüp ung Othniela naw ani am apa ah khaw akthäh vai ah pyen nak ci. Ani cu ang sela ung ka kyum law khäta, Kaleb naw a in a ng’ya hlük ci ang cine ng’shik ci.

¹⁵ Ani naw, “Kei naw tuilawng gui ka ng’ya hlük ci nei, na na pek ah khaw cu khaw chawng ah kyak ci nei” cik ci. Cun ah kyasei Kaleb naw acho la a hai ung tui m’lawi gui cu pek ci.

Judah la Benjamin Pakhui gui ah Nängnak

¹⁶ Moses ah akawi ah hta ng’shon kenit chang cu Judah chang gui awn a täng ah Jerikho, cankhaw mang gaw ungka naw Judah khaw Arad ah a htum, m’dek kä nik ciah khaw ung lut ci gui. Acu ah ngami cu Amalekit gui ah ng’lung ah om tuk ci gui.

¹⁷ Judah chang gui cu Simeon chang gui awn gui ne hteit u ne, Zephart mang gaw ung om ciah Kanaanit gui cu tu ghawm ci gui. Ngami naw mang gaw cu taam u ne, m’di ci gui, Hormah ah ang ming sui ci gui.

^18-19 Bawipa naw Judah chang gui cu m’thei gui ci, ngami naw Khaw-gui khaw cu kanak ci gui. Cun ung phi kaza, Ashkelon, käcung Ekron la angveing zung ah khawpäng gui cu ngami naw kä khäm hlawt ci gui. Shin ah chang gui cu tukam un gang däih ah om ci gui, ngami ung m’sii yatha gui om ci. Cun ah kyasei Judah chang gui naw kä k’täm gui hlawt ci gui.

²⁰ Moses ah thumkhäm ah mäih ah Hebron cu Kaleb am pek ci gui, ani naw Anak ah hta ng’shon pahta thum cu mang gaw ungka naw k’täm gui ci.

²¹ Cun ung phi Benjamin pakhui chang gui naw Jerusalem ung om ciah Jebusit gui cu kä k’täm gui hlawt ci gui. Cun ah kyasei Jebusit gui cu om lä u ne, acun ung Benjamin chang gui awn om ghawm lä ci gui. Ephraim la Manasseh pakhui gui naw Bethela cu näng ci gui.

^22-23 Ephraim la Manasseh pakhui naw Bethela mang gaw cu hteit ne tuk ci gui, cun cu cun yah ung Luz ah ami pyen ah kyak ci. Bawipa naw m’htei gui ci. Ngami naw mang gaw k’täät khai cu tüi ci gui,

²⁴ ng’däät ci gui naw mang gaw ung ka chang tumat law sei hmu u neta, ani am, “mang gaw ung luh nak ah lam nam shüm gui ä, a i ah kä kami ning cik khai nei” cik ci gui.

²⁵ Ani naw lam shüm gui khäta, Epraim la Manasseh gun aw mang gaw ung chang cu ngawn yawp ci gui, acun ah chang la akyongchang bäng kä ngawn ci gui.

²⁶ Cun kawn ah ani cu Hittit khaw ah hteit mang gaw k’süm ne, Luz ah aming sui ci, cun cu atuh güt awn ming nak ci. Israel gui naw kä ami k’täm gui ah chang gui.

²⁷ Manasseh pakhui gui naw, Beth Shan, Taanach, Dor, Ibleam, negiddo mang gaw gui la a pei zung ah gawnu gui ung om ciah chang gui cu kä k’täm ci gui; Kanaanit gui cu acun ung om tu gäk gäk ci gui.

²⁸ Israel gui ami thamah law pi kawn ah, ngami naw Kanaanit gui cu bi bi sak gui ci gui, cun ung phi tu ä ami van kä k’täm gui ci gui.

²⁹ Ephraim pakhui gui naw Keyera mang gaw ung om ciah Kanaanit gui cu kä k’täm gui ci gui, cun ah kyasei Kanaanit gui acun ung ngami awn a täng ah om ci gui.

³⁰ Zebulun pakhui gui naw Kitron la Nahalala mang gaw gui ung om ciah chang gui cu kä k’täm gui ci gui, cun ah kyasei Kanaanit gui cu acun ung ngami awn a täng ah om ci gui, ngami cu bi bi sak gui ci gui.

³¹ Asheza pakhui gui naw Akko, Sidon, Ahlab, Achzib, Helbah, Aphek la Rehob mang gaw ung om ciah chang gui cu kä k’täm gui ci gui.

³² Asher chang gui cu ana om ciah Kanaanit gui awn a täng ah om ci gui, ngami naw ahtük ge ung kä ami k’täm gui ah kyak ci.

³³ Naphtali pakhui gui naw Beth Shemesh la Bethanath mang gaw ung om ciah chang gui cu kä k’täm gui ci gui. Naphtali chang gui cu ana om ciah Kanaanit gui awn a täng ah om ci gui. Cun ung phi bi bi sak gui ci gui.

³⁴ Amorit gui naw Dan pakhui gui cu khogui täng ah gawt gui u ne, a güng täng ah kä law tu ba sak gui ci gui.

³⁵ Amorit gui cu Aijalon, Shaalbim la Heres m’htung täng ung om lä ci gui, cun ung phi Ephraim la Manasseh pakhui gui naw ami uknak ka ah tha gui u ne, bi bi sak gui ci gui.

³⁶ Sela gawnu ah a siiptäng ung Edomit Khogii naw Akrabbim k’hteng kan ne hteit ci.