SOLOMON NG’Ä~ 4 - Cho Bible Common Language 2016

Pami

¹ Ka m’hni aw, nang cu na kyom aih ci nei! Lushung ah hnu ah na mik cu m’hni nak kawn ng’shü ci nei. Na lusam cu Kilead khogui ah kaa kyum lawk ciah me amak ah mäih ah kyak ci nei.

² Na ha gui cu amu tei ung tui m’si thai ah htome ah mäih ah bawk ci nei. Tumat phi kä k’pawih ci; ami van ang phi ciah hta ci gui.

³ Na m’nei cu asen ih pyai ah mäih lawk ci, Nang na ng’thu law ung cun cu m’hni aih vai kyak ci. Na lushung ah hnu ah na ng’being cu kyom ci.

⁴ Na hnügawn cu tänghän ah mäih ah kyak ci, äh awi gui cu shawiphaw phia khak veing ne bah ah mäih ah kyak ci gui, cun gui cu ng’veing ne ng’mi ci gui.

⁵ Na ng’kyaang cu kigang nu ah mäih ah kyak ci, tuili chei ah ng’lung ah ei ei ciah kigang ang phi ah mäih ah kyak ci.

⁶ Kei cu Muran khogui, tui ng’ui khogui ah kho a thaih law güt ung, khomü ang pyi güt ung ka om khai nei.

⁷ A i hlawk ah na kyom ci ang, ka m’hni aw; a i hlawk ah na kümbe ci ang!

⁸ Ka ng’lami aw, Lebanon m’htung ah ka kei awn atäng ah law ä; Lebanon ah ka kei awn atäng ah law ä. Amana m’htunglai ah ka law ä, Senir la Hermon m’htung ah ka law ä, Cun cu phongkawng gui la kawnghta gui ah om nak ah kyak ci nei.

⁹ Ka m’lung ung tuihlim ciah ng’lamihta aw, na mik awn na na phak ci nei, na awi ah äh-awi naw ka m’lung na k’pang ci nei.

¹⁰ Na m’hni nak naw na tuihlim sak ci nei ka m’lung ung tuihlim ciah ng’lami hta aw. Na m’hni nak cu sapyit tui ah bä pi ci nei; nang ah tui ng’ui cu, tui ng’ui ni ah ni pi ci nei.

¹¹ Ka m’hni aw, na m’nei cu khoitui ah mäih ah tui ci; nang ah m’lei cu kei ah phäh ah suuk tui la khoi tui ah kyak ci nei. Na suisak gui cu Lebanon tui ng’ui avan ah mäih ah kyak ci nei.

¹² Ka m’lungung tuihlim ciah ng’lami hta cu, ghei ah u-yin, vongpang ah u-yin, m’hnüt ah tuilawng ah mäih ah kyak ci nei;

¹³ a cu ah geit gui tho ci, Ngami cu htale-sing gui abe ah mäih ah tho ci gui, akni pikbäih ah m’theih ci gui. A cun ung tansing la naduh sing gui,

¹⁴ M’htubei, karavui, sing ui, kä cung sing ng’ui agü a hlü om ci. Muran la sha sing gui phi tho ci, avan cu ang ui pikbäih ah kyak ci gui.

¹⁵ Tui ah ni nak ah u-yin, tui hta gui phi long ci, Tuilawng gui phi Lebanon khomhtung gui ungka long lawk ci.

Hnumi

¹⁶ A siip ah khokhi, tho law. A htum ah khokhi, ka u-yin ung khi law; khokhi cu tui ng’ui awn be sak ä. Kei ah ka m’hni cu ani ah u-yin ung law ne, a cun ah m’theih akni pi gui cu ei sä.