SOLOMON NG’Ä~ 3 - Cho Bible Common Language 2016

¹ Amü tä sei ka ih phak ung ka ip ci kei naw ka m’hni cu ka mang nak ci; Kei naw ani ka shui ci, cun ung phi kä ka hmuk ci.

² Kei naw mang gaw pum ung ng’vaak ne, lam cawh lam hta gui yung ah, kei naw ka m’hni tumat cu ka shui ci. Kei naw ka shui ci, cun ung phi kä ka hmuk ci.

³ Mang gaw ngäng gui ng’hleh ci gui naw kei cu na hmuk ci gui. Kei naw, “Kei ah ka m’hni ah chang cu nami hmu ne ang?” cine ka ng’shi gui ci.

⁴ Ngami ka hteh tak gui vai am ani cu ka hmuk ci. Kei naw ani cu pang ne kä ka hteh ba sak ci ka nu ah im ka ng’tüi nak ah akhan kyong güt ah ka hteh püi ci.

⁵ Jerusalem hnumi, kei ung shaitak ä; kigang la sakchou ung ng’tam ä, cun ung nangmi naw keimi ah m’hni nak kä nami plawh khai.

A thum nak ng’äi Hnumi

⁶ Bungpuk ah kaa meikhu ah mäih ah khu lawk cicu a i ang, tui ng’ui la mura ah ng’ui ci, sumlei ci gui ah ami yoih ah tui ng’ui ang?

⁷ Solomon cu lawk ci, amang kiang ung law püi ci gui; ani ngäng ciah gakap chihkip lawk ci, cun gui cu Israel ung akbäpi gui ah kyak ci.

⁸ Ngami ami van cu khim bi thei ci gui; ngami cu ng’tuk nak ng’thei pyi ci gui ah kyak ci. A chang sing naw khim sem kawt ci gui, cun cu mü ung ami ng’tuk nak vai ah kyak ci.

⁹ Ghangpughang Solomon cu mangkiang ung law püi ci gui, Cun cu sing aknipi awn pyan ah kyak ci.

¹⁰ Cun ah tung gui cu ngui awn vook, a hnu täng cu ghui awn pyang ci gui. A cun ah yihdung cu pä awn cüiche ci gui, Cun cu Jerusalem hnumi gui naw m’hni nak awn ami tah ah kyak ci.

¹¹ Zion hnumi gui, law ne ghangpughang Solomon cu teng law vä. Ani naw anu naw alu ung akbün ah lukhu cu ng’büng ci nei, cun cu a chumah hnüüp ung kyak ci, a yeikyai hüithaw nak ah hnüüp ung ah kyak ci.