SOLOMON NG’Ä~ 2 - Cho Bible Common Language 2016

¹ Kei cu sharon kho ah m’gho cheipai, khomhtung nawi ah tuili chei ah mäih ah ka kyak ci.

Pami

² Ng’hling gui ah hmu ah tuili chei ah mäih ah hnumi gui ah ng’lung ah kei ah m’hni cu kyak ci.

Hnumi

³ Kei ah ka m’hni pi cu ahei pami gui awn m’täng ung, bunghmu sing ghing gui ah ng’lung ah htuitui sing awn täng ci nei. Kei cu ani ah ng’hnim ung ka ngaw hlük ci, acun ah m’theih cu ei ung tuui aih ci nei.

⁴ Ani naw chünla ciah a kyong khui ah na hteh püi ne, kei ah khan ah am hni nak cu thawh sak ci nei.

⁵ Sapyit theih ket awn thagui nak be ne, htuitui theih awn na cimvai sak ci nei! Kei cu cümbawng ne ka tha ken ci nei.

⁶ A eng täng kut cu ka lu ah kaa ah om ci, ak pat täng kut awn na kyawp ci nei.

⁷ Jerusalem hnumi, kei ung shaitak ä; kigang la sachou awn ng’taam ä, cun ung nangmi naw keimi ah yum nak kä nami plawh khai.

A hnih nak ah ng’äi Hnumi

⁸ Ka m’hni ah k’aw cu ka ng’yak ci nei. Ani cu khomhtung gui khan ne dawng ne law ne, khogui gui kaan ne kei ah lawk ci nei.

⁹ Kei ah ka m’hni cu kigang nu ah mäih, kigang nong ah mäih ah kyak ci. A cu ah anu cu k’pang pei ah ng’düi ci. Ani naw m’kawt ungka naw teng ci, k’puut ungka naw m’cih ci nei.

¹⁰ Ka m’hni naw na ng’htau püi ci nei. Law ä, ka m’hni aw. Kei ah ka m’hni aw, kei awn atäng ah law ä.

Pami

¹¹ Khosik cu maih lawk ci; kho k’aa cu ng’düm pyi ci nei;

¹² K’pyaama ah cheipai gui m’guh ci gui. Shin cu ng’äi m’cu nak vai ah akhin ah kyak ci; Lo yung ah müm ah ng’kyuut cu ng’yak nei.

¹³ Thei gui cu up lawk ci gui; Sapyit gui cu pai sei khokhi ung ng’ui ci nei. Law ä, ka m’hni aw; Kei ah ka m’hni aw, kei awn atäng ah law ä.

¹⁴ Nang cu lung k’eep ung ng’thup ciah müm ah mäih ah na kyak ci nei. M’hni aih ah na hmai cu na hmuh sak ä, ng’yak hlü nak aw cu na ng’yak sak ä.

¹⁵ Pai lawk ciah mi sapyit cu ng’theih sak ä. Kä ami m’di pha ung, Sa ui gui, sa ui hta gui cu pha gui vä.

Hnumi

¹⁶ Kei ah ka m’hni cu kei ah kaa, kei cu ani ah kaa. Ani naw a htomak gui cu tuili chei gui ah ng’lung ah vuh ci,

¹⁷ cun cu kho ngawi hta khaw a pyü güt, khaw hmüp ang kawn güt ah kyak ci. Kei ah m’hni aw, kigang nu ah mäih ah ng’hlat law ba ä, Bether khomhtung ung kigang nong ah mäih ah law ba ä.