SOLOMON NG’Ä~ 1 - Cho Bible Common Language 2016

¹ A kyom pikbäih ah ng’äi gui cu Solomon ah ng’äi gui ah kyak ci.

A tumat nak ah ng’äi Hnumi

² Na ui hnam nak ah na m’nei naw na küm ci; Na m’hni nak cu wine ah ta bä pi ci.

³ Nang ah mawng cu tui ng’ui ah kyak ci; na ming ni naw cun cu khü ci. A u hnumi naw phi kä ning m’hni ne kä om hlawt ci.

⁴ Na la law ä, ni dawng kawm ni; ka ning ghangpughang nak khai nei, na im kyong ah na hteh püi ä. Atäng ah ni yeikyai khai nei, Hlim sei ei aw ne yumhni nak ung ning len khai nei. Hnumi avan naw ami ning m’hni cu cäi vai ah kä kyak ci.

⁵ Jerusalem hnumi, kei cu kasa a hmüp ung phi ka kyom ci nei, Kedar khong gau ung phung sham ah mäih ah ka hmüp ung phi, Solomon ah mang im ung yihdung ah mäih ah ka kyom ci nei.

⁶ Khohni naw na so sei kasa ale ah phäh ah kä na gaih en tuä. Ka phäi gui naw na m’lungshe na u ne, sapyit lo ah bii na bi sak ci gui nei. Kei naw ka mät ka tengkhen nak vai akhin kä om ci nei.

⁷ Ka m’hni aw, na m’thein ä, A hawi ang na htomak gui na shäm kaw? Kho hnüüp ling yah ung ngami a hawi ang ami ng’düm kaw? Kei naw a i ah kyasei nang cu ahei htome k’shäm gui ah ng’lung ah ka ning shui vai a hlü ang?

Pami

⁸ M’hni pikbäih ah hnumi ah a hmun kä na hmat ne ma? Hteit ne htomak gui läk ä; htoshäm gui ah phung ah pei ah na me gui ah phäh ah khulim nak cu shui ä.

⁹ Nang ka m’hni aw, Pharaoh ah yatha ung ng’se khla gui cu, ng’senu naw ami tha a thawh sak ah mäih ah pami gui ah tha cu na thawh sak ci nei.

¹⁰ Na lusam cu na ng’being ah khan ah kyom ne, na hnü angveing ung vailung ah mäih ah kyak ci nei.

¹¹ Keimi naw nang ah phäh ah ghui a äh-awi cu ngui awn cüiche ne kami pyang khai nei.

Hnumi

¹² Ka ghangpughang cu angte nak ung ng’yän ci nei, kei ah ka tui ng’ui cu khokhi ung be ci nei.

¹³ Kei ah ka m’hni cu ka coi ung ang pawm yah ung, muran tui ng’ui cu ng’ui lawk ci nei.

¹⁴ Kei ah ka m’hni ah chang cu Enkedi sapyit lo ung pai ciah cheipai ah mäih ah kyak ci nei.

Pami

¹⁵ Ka m’hni aw, na kyom aih ci nei; Na mik cu m’hni nak awn ng’shü ci nei!

Hnumi

¹⁶ Ka m’hni pikbäih aw, na kyom aih ci nei; na na yei sak aih ci nei! Khu m’kim gui cu mi ih phak ah kyak khai nei;

¹⁷ Cedar sing gui cu mi im ung lawng dang ah kyak khai, saipres sing gui cu ceilling ah kyak khai.