SAM 99 - Cho Bible Common Language 2016

Khanpughi A hlüngpi Ghangpughang

¹ Bawipa cu ghangpughang nei! Chang gui naw kyih aa u sä. Ani cu Cherubim ah khan ah amawng kyang ung ngok ci nei, khomdek cu thüng sä.

² Bawipa cu Zion m’htung ung hang tai ne, pakhui van ah khan ah hlüngtai ci nei.

³ Chang avan naw dämduh ne hlüngtai ciah aming cu m’taam khai nei. Ani cu theingcim ci nei!

⁴ M’gäi ciah ghangpughang, nang naw düng nak la nikiom nak cu na law püi ci.

⁵ Bawipa mi Khanpughi cu m’taam vä; A mang kiang ah pei ah khawihnah vä! Ani theingcim ci nei!

⁶ Moses la Aaron cu a taigüpa goi ah kyak ci, Samuel cu ani ah taigü ciah kyak ci; Ngami naw Bawipa cu khü u sei, Ani naw m’shang gui ci.

⁷ Ani naw kho ng’mei ng’von ung om ne ng’thu püi gui ci; Ngami naw a thukhän la a thumkhän a pek gui cu ngai ci gui.

⁸ O Bawipa, kami Khanpughi, Na chang gui cu na m’shang gui ci nei; Ami katnak na m’kyuk gui ung phi, m’geinsei ciah Khanpughi ah na kyak cu na m’dang gui ci.

⁹ Bawipa mi Khanpughi cu m’taam vä, Theingcim ciah khomhtung ung khawihnah vä! Bawipa mi Khanpughi cu Theingcim ci nei.