SAM 97 - Cho Bible Common Language 2016

Khanpughi Ak hlüngpi Uktu

¹ Bawipa cu ghangpughang nei! Khomdek cu yei sä! Tui ah koi khokawng gui phi yeikyai u sä!

² Kho ng’mei la khomü naw ani cu koi ci; Ani naw düng nak la müi nak awn uk ci nei.

³ Mei däi cu ama ah hteit ne, a pei leng ah a ga gui cu ui gui ci.

⁴ Ani ah lailäp naw khomdek khan cu shü ci; khomdek naw a cun hmu neta ng’thüng ci.

⁵ M’dek khan van ah Bawipa ah ma ah, Bawipa la khomhtung gui cu khoi chap ah mäih ah tui ne ng’nawi ci gui.

⁶ Khankho gui naw ang düng nak cu ng’shäu ci gui, changpakhui avan naw abäimang nak cu hmuk ci gui.

⁷ A gup khawihnah ci gui phung cu lü ng’a ci gui nei, khanpughi gui ami van cu Bawipa ah ma ah kawp ci gui nei.

⁸ Zion chang gui cu yei ci gui, Judah mang gaw gui cu yeikyai ci gui, cun cu düng ciah na m’khoi m’cha ah hmawk ah kyak ci nei, Bawipa.

⁹ M’gäi ciah Bawipa, nang cu khomdek avan uktu ah na kyak ci; Nang cu khanpughi gui avan nata, akdäm na hlüngtai pi ci nei.

¹⁰ Bawipa naw akshe m’keih ci gui cu m’hni yum gui ci; Ani naw akchang gui ah ghin nak cu shungvong ci. Chang ashe ah huham ungka ani naw gung gui ci.

¹¹ Düng ciah khan ah akdei cu ng’shü ne, nik ciah khan ah yeikyai nak om ci.

¹² Bawipa ah bi lawh hmawk ah düng ciah chang gui avan yeikyai vä! Theing ciah Khanpughi ah bilawh cu shüm ba vä, ani cu m’hlüngtai vä.