SAM 96 - Cho Bible Common Language 2016

Ak hlüng pi Ghangpughang Khanpughi

¹ Bawipa ah ma ah ng’äi thai m’cu vä! Khomdek chang avan naw, Bawipa am ng’äi m’cu vä!

² Bawipa am ng’äi m’cu vä, ani cu m’taam vä! Ana hun nak gui ah mawng thu ni cu ak hnüüp tä sei ng’shäu vä.

³ Abäimang nak cu pakhui van am m’thein ne, m’gäi ne a hnün thawh nak cu chang van ung ng’shäu vä.

⁴ Bawipa cu dämduh ci kya sei, ak hlüng pi ah m’taam vä; Ani cu khanpughi gui avan ah khan ah m’taam khah vai kyak ci nei.

⁵ Chang khuihei gui ah khanpughi gui cu, a gup gui ah kyak ci, cun ung phi Bawipa naw khankho cu tüisho ci.

⁶ Bäimang nak la hlüngtai nak naw ani cu k’oi ci; huham la kyom nak naw a Pum im cu k’be ci.

⁷ M’dek khanchang van naw Bawipa cu m’taam vä; A bämang nak la am gäi nak cu m’taam vä;

⁸ Bawipa ah a ming küüi cu m’taam vä, pek taak vai law püi ne a Pum Im ah law vä.

⁹ Theing cim cicu ang dang law ung ama ah kawp yawp vä; m’dek khan avan ama ah ng’hlet ne kyi vä!

¹⁰ Chang pakhui van ah ma ah, “Bawipa cu ghangpughang nei! cine pyen vä. Khomdek cu a hmun ung khäng ne kä ng’nawn hlawt ci nei; Ani naw chang gui cu düng nak awn m’khoi m’chak khai nei.”

¹¹ Khomdek la khankhomik yeikyai vä! Tuinu gaai sä, a cun ung om ciah ak ghing avan yei u sä;

¹² Kho dou la a cun ung om ciah ak ghing avan yei u sä! Bung ah om ciah sing ghing avan yei ne m’lau khai gui nei.

¹³ Cun cu Bawipa law ne khomdek a uk law ung ah kyak khai nei. Ani naw hnicim chang gui cu düng nak la ni kyom nak awn uk khai nei.