SAM 95 - Cho Bible Common Language 2016

M’taam nak Ng’äi

¹ Law vä, Bawipa mi m’taam khai! Mi yii ah Khanpughi ah yei ne ng’äi mi m’cu khai!

² Law vä, ama ah mi m’hlüngtai khai, yeikyai nak ng’äi m’cu ne mi m’taam khai nei.

³ Bawipa cu m’gäi ciah Khanpughi, khanpughi gui avan ah khan ah m’gäi ciah ghangpughang nei.

⁴ Ani naw m’dek khan avan cu ak thuuk pi bäih ah khui ungka naw ak hlüng pi bäih ah m’htung ung khüt sei, uk ci nei.

⁵ Ani naw amät ah pyan ah tuinu la amät ah m’thaam ah kho kawng avan cu uk ci nei.

⁶ Law vä, ama ah kawp ne mi khawihnah khai; Na tüisho gui ciah Bawipa ah ma ah mi m’khuukdong khai nei!

⁷ Ani cu mi Khanpughi, mikmi cu am hteihtang ah chang, a tu m’bei ah htome ah mi kyak ci. Tuh ngawi ani naw a i a pyen cu nami ngaih vai nei;

⁸ “Kä nami ling aih vai nei, nami pupa gui Meribah ung ami kyak ah mäih ah, cu hnüüp ung Massah bung ah ami om ah mäih ah kä nami kyak vai nei.

⁹ A cu ah ngami naw kei cu na m’nüm ne, na k’kut ci gui, cun ung phi ngami ah hmawk ah ka bi cu hmuk ci gui nei.

¹⁰ Kho kum phli kip ung cun ah chang gui naw na m’shemshai ci gui nei. Kei naw, ‘Ngami cu kä bekhüt aih ci gui nei! Ngami naw kei ah thumkhän cu kä läk hlük ci gui nei.’

¹¹ Kei naw m’lungshe neta, küikyang ciah ka shaitak cu: ‘Nami ng’düm nak vai ah ka ning pek gui ah kho ung, nangmi kä nami lut phung khai nei’” ciah kyak ci.