SAM 94 - Cho Bible Common Language 2016

Khanpughi Cu Chang Van ah Suki

¹ Bawipa, nang cu m’kyuk ciah Khanpughi ah na kyak ci; na m’lungshe nak cu ng’leet law sak ä!

² Nang cu chang van ah suki ah na kyak ci; tho law ne, chang ah ng’shei ci gui ah om ih cu m’cha pe gui ä!

³ Changshe gui cu a i güt yeikyai khai gui ang? A i güt ang, Bawipa?

⁴ Shetkat ciah chang gui cu a i güt m’ghäm’ce u ne, ami katnak awn khähghah khai gui ang?

⁵ Bawipa, na chang gui cu hnim u ne, nang ung om ci gui cu shedam nak ci gui nei.

⁶ Ngami naw hmeinu, hmeihta gui cu ngawn gui u ne, kami kho ungka khin chang gui cu ngawn ci gui nei.

⁷ Ngami naw, “Bawipa naw kä na hmu gui ci, Israel Khanpughi naw kä na hmat gui ci” cik ci gui nei.

⁸ Ka chang gui aw, a i hlawk ah shin ah nami gu-ang ang? A i sangung nami theithang lawk khai ang?

⁹ Khanpughi naw mi hnga na pyang gui ci — ani naw kä ng’yak khai ma? Ani naw mi mik na pyang gui ci — ani naw kä hmuk khai ma?

¹⁰ Ani naw changpakhui gui cu züi m’cäi gui ci — ani naw kä m’kyuk gui khai ma? Ani cu chang mi van ah saya ah kyak ci — ani naw a i kä hmat khai ma?

¹¹ A i ami ngaih-tüh cu Bawipa naw hmat ci; ngami ah m’lung ngaih akholä ah akyak cu ani naw hmat ci.

¹² Bawipa, nang naw na m’shüm thein ah chang, na thumkhän na m’thei ah chang cu yeikyai nak om ci nei!

¹³ Khüikha yah ung düm nak na pek ci, changshe gui pha nak vai khui kä cawh pha ah chuih,

¹⁴ Bawipa naw a chang gui kä nawng gui khai; Ani ung om ci gui cu kä k’täm gui khai.

¹⁵ Ng’düng nak cu m’khoi m’cha nak ung dang law ba sei, düng ciah chang avan naw läk khai gui nei.

¹⁶ Changshe gui hnu ng’tuk püi ne, kei täng ah ng’düi khai a u ang? Cheishoh ci gui hnu na ne, kei täng ah om khai a u ang?

¹⁷ Bawipa naw kä ana m’htei ah akyak ung, kei cu kä khi m’deuh nak ah kho ah ang ghit ah ka hteit khai nei,

¹⁸ Kei naw, “Ka zu ng’kya vük ci nei” ka cik ci, cun ung phi Bawipa, bä ciah na m’hni nak naw kei cu na m’htei ci nei.

¹⁹ Kei cu cäicat ne ka ng’ä ai yah ung, nang naw m’lung na üp sak ne, na na yei sak ci.

²⁰ Nang cu kä düng khai ah m’khoichak ci awn kä na ng’pha ci, ngami naw kä cang cu cang ah pyang ci gui.

²¹ Ngami naw changni cu huut ne hnu na u ne, akat nak kä om cicu m’sih ci gui nei.

²² Cun ung phi Bawipa naw na shung ne, ka Khanpughi naw na ng’vong ci nei.

²³ Ani naw ami shetkat ah hmawk ah m’kyuk gui ne, ami cheishoh ah hmawk ah m’di gui khai; Bawipa mi Khanpughi naw m’di gui khai nei.