SAM 92 - Cho Bible Common Language 2016

M’taam nak Ng’äi

¹ O Bawipa, ning m’hlüngtai nak cu ni aih ci nei; O A hlüngtai säih Khanpughi, ng’äi awn ning m’taam nak,

² A ngawi tä sei ng’täi ciah na m’hni nak, amü tä sei na bekhüt nak, ng’shäu ne pyen ne,

³ gui awn pyan ah tum khawn la ak aw nik ciah tingtäng tum ne ning m’taam cu bä aih ci nei.

⁴ O Bawipa, m’gäi ciah na hnünthawh nak naw, na yei sak ci; Na bi gui ah hmawk ah yei ne ng’äi ka m’cu ci.

⁵ Bawipa, na bi lawh gui cu küikyang aih ci nei! Na ngaih-tüh gui phi thuuk aih ci nei!

⁶ Shin ah a mawng cu ak gu naw kä a hmat; ak ang naw kä a k’shing:

⁷ Changshe gui cu khu m’ghaw ah mäih ah tho u ne, cheishoh ci gui cu ami bä mang ung phi; ngami cu di ne htin khai gui nei,

⁸ Cun ung phi nang läi cu angtäi sei hlüngtai ciah Bawipa ah na kyak ci nei.

⁹ Na ga gui ami van cu si u sei, changshe gui ami van cu tuh ne na k’täm gui khai cicu kami hmat ci nei.

¹⁰ Nang naw kei cu pyawng ah mäih ah na gai sak ne, yeikyai nak hriham na na pek ci.

¹¹ Kei naw ka ga gui na tuk cu hmu ne, changshe gui ah kyah cu ka ng’yak ci nei.

¹² Ng’düng ciah chang gui cu sagui ghing ah mäih ah bämang u ne, Lebanon kho ah m’htai ghing ah mäih ah ng’ghaw bai khai gui nei.

¹³ Ngami cu Bawipa ah im ung geit ah sing ghing ah mäih kya u ne, mi Khanpughi ah pum im ung bämang ci gui,

¹⁴ Cun cu a ghi law güt m’theih ne, angtäi sei m’kim ne khäng khai gui nei.

¹⁵ A cun naw Bawipa ah düng nak la ka khozii ung cheishoh nak kä a om ah mawng cu dang sak ci nei.