SAM 91 - Cho Bible Common Language 2016

Khanpughi Mi Ng’yii nak

¹ Phyawn vai ah Bawipa ah hteit ci phung, Am’gäi ah shung vong nak ung om ci phung naw, ama ah

² Ng’thu a pyen vai cu, “Nang cu ka ng’yii nak la na shung vong ciah na kyak ci. Nang cu ka Khanpughi; nang ung kei ka ng’ap ci,” ciah kyak ci.

³ Ani naw ng’thup ciah kyih nak la sih natnak avan ung k’pang ne ning phyawn ci.

⁴ Ani naw ang phiaa awn ning küm gui sei, ani ah m’htei nak ung, nangmi cu nami phyawng khai; Ani ah bekhüt nak naw ning shung ne ning vong gui khai.

⁵ Nang naw khomü ah a i kä na kyih vai, kho hnüüp ah ning tuk khai phi kä na kyih vai,

⁶ Hmüp khui ung om ciah leigai la khodei ung ngawn thei ciah changshe cu kä na kyih vai.

⁷ Na pei ah chang phia gha, na ng’leng ah chang tämkäp a sih ung phi, nang a i naw kä ning haw khai.

⁸ Changshe gui ah di nak cu nang naw teng ne, a hmuh bäng ah na hmuk khai.

⁹ Nang naw na ng’shung nak cu Bawipa ah kyak ci. A hlüngtai säih cu na ng’yii nak ah kyak ci,

¹⁰ Cun ah kyasei nang ah khan ah hungsai kä gawk lawk khai, Tui mei naw na im kä k’et phung khai.

¹¹ Khanpughi naw nang ning ngäng khai, na hteh nak päng ah ning m’htei khai ah a khanchang cu yuk chah lawk khai.

¹² Ngami naw na khaw lung naw kä ning shun vai ah ami kut tawn ning chang khai gui.

¹³ Nang naw phongkawng gui la k’phyu ng’hlui gui, kawng hta gui la k’phyu m’äm ah gui cu na kho awn güt ne na kai nak khai nei.

¹⁴ Khanpughi naw, “Kei na m’hni cicu kei naw ka hun khai, kei Bawipa ah na hmat cicu ka m’taam khai.

¹⁵ Ami na khü ung ka m’shang gui khai. Ami geinvai yah ung ka om püi gui khai. Kei naw gung gui ne, ka m’taam gui khai.

¹⁶ Aksho ghin nak cu m’cümhnah gui ne, kei naw ka hun gui khai.”