SAM 90 - Cho Bible Common Language 2016

CAUK APHLI NAK ( Sam 90—106 ) Khanpughi La Chang

¹ O Bawipa, nang cu angtäi sei keimi ah im ah na kyak ci.

² Khomhtung gui la khomdek khan ak ghing avan kä na tüisho pha ge ung, cau pui tün ne Khanpughi ah na kyak ci, ngawi yä Khanpughi ah na kyak khai.

³ Chang cu zan ä akyak te ah akyak ba vai ah nang naw na pyen ci; m’vut khui ah na ng’plouh ba sak ci.

⁴ Kho kum phia gha cu nang ah ma ah hnüüp ät ah mäih ah kyak ci; cun cu ng’pyi pyi ciah zan ta ah mäih, Khomü ät ung nayi ät hta ah mäih ah kyak ci.

⁵ Nang naw tui k’hlaw ah mäih ah na na hteh püi ci; Keimi cu ng’mang amaih ah mäih ah kami kyak ci. Keimi cu kho ngawi hta ah ng’tawn ne däm ciah khu m’ghaw ah mäih ah kami kyak ci,

⁶ Cun cu ng’ghaw ne, m’guh ne, pai ci, cun ung phi mühun lam ah chawng ne sik ci.

⁷ Keimi cu na m’lungshe nak naw na m’di gui ne; Na nget ngawng nak naw na kyihkyawk sak gui ci.

⁸ Nang naw kami katnak cu na ma ah bum ne, m’zih ne kami katnak cu na hmuh nak vai ung na tha ci.

⁹ Keimi ah ghin nak cu na m’lungshe nak naw m’chün ne tawi sak ci; cun cu adüm ah ng’thu k’aw ah mäih ah ng’kawn ci.

¹⁰ Mi van ah kho kum cu kum chih kip ah kyak ci — mi gai ung kum cheit kip ah kyak ci; cun ung phi cun gui nü cu geinvai nak la azä nak ah kyak ci; ghin nak cu ang ghit ah ng’pyi sei mikmi cu mi ng’kawn ci.

¹¹ Na m’lungshe nak ah huham akbe a u naw hmat thei ne ang? Na ngetngawng nak naw a i hlawk ah kyih vai law püi hning ci cicu a u naw hmat ne ang?

¹² Kami ghin nak a i hlawk ah a tawi ah mawng cu na m’thei gui ä, cung vah keimi kami cüivai lawk khai.

¹³ Kho a i khäta na m’lungshe nak cu ng’pyi khai ang? O Bawipa, na changshäm gui cu na m’gein gui ä!

¹⁴ Kho ngawi tä sei, ng’täi ciah na m’hni nak awn na k’be gui ä, cun ung keimi cu ng’äi m’cu ne kami ghin kho ng’län ung kami yei khai.

¹⁵ Cümbawng ne kami ghin nak gui ah kho kum ung thüi sei nak, na na pek gui chü ah yei kiai nak cu tuhbäi na pe gui ä.

¹⁶ Bä ciah na hnün thawh nak cu na changshäm gui am na hmuh sak gui ne, chün ciah na m’gäi nak cu kami hta ng’shon am hmuh sak gui ä.

¹⁷ Bawipa kami Khanpughi, na hriham cu keimi ah khan ah gawk law sä. Kami bi nak phung ung näng nak na pe gui ä!