SAM 9 - Cho Bible Common Language 2016

Ataga ah Phäh ah Khanpughi Yeikyai nak

¹ Ka m’lungkyong avan awn ka ning m’hlüngtai khai nei, Bawipa, Cäicat vai nabi gui avan cu ka pyen khai nei.

² Nang ah hmawk ah yei ne ng’äi ka m’cu khai nei, A hlüngtai säih Khanpughi, ning m’hlüng m’tai ne ka ng’äi khai nei.

³ Nang na dang ung ka ga gui ng’hlat ci gui; ngami cu zu ng’kia ne sik ci gui.

⁴ Nang naw ng’htei ne düng khai ah na m’khoi chak ci, kei täng ah na m’khoi chak ci.

⁵ Nang naw chang khuihei gui m’kyuk gui ne Changshe gui na m’di gui ci, ngami cu a ngawi ah phi a u naw kä shüm gui khai.

⁶ Kami ga gui cu ng’pyi pyi ci gui, Nang naw ami mang gaw gui cu na m’di pyi ci, Ngami cu ng’pyi ne htin ci gui.

⁷ Cun ung phi Bawipa cu angtäi sei ghangpughang ah kyak ci nei. M’khoi cha nak vai ah a mang kiang cu co ci nei.

⁸ Ani naw düng nak awn m’dek khan cu uk ci nei; Pakhui cu taga khai ah m’khoichak ci nei.

⁹ Bawipa cu dukdeiu nak gah ci gui ah ng’yii nak, gein vai yah ung ng’pha nak ah kyak ci.

¹⁰ Bawipa, ning hmat ci gui cu, ng’ap lawk khai gui nei; Nang ah lawk ci a u phi nang naw kä na ma nak ci nei.

¹¹ Zion kho ung uk ciah Bawipa am ng’äi m’cu vä! Ani ah bi lawh ah mawng cu pakhui päng-am’thein vä!

¹² Dukdeiu nak gah ci gui cu Khanpughi naw shüm gui ci; ngami ah ng’hui ng’pa nak cu kä m’hnih ci, ngami ah khan ah ak ka bik ci cu m’kyuk ci.

¹³ O Bawipa, na chimgein ä! Ka ga gui naw nak shekha na u sei, ka geinvai cu na teng ä! O Bawipa, sih nak ung nak phyawn ä!

¹⁴ Cun ung kei cu Jerusalem chang gui ah ma ah ng’düi ne, Nang ka ning zeinak ah mawng avan cu ngami am ka m’thein gui khai nei. Nang naw na na hun ah hmawk ah ka yei kyai khai nei.

¹⁵ Chang khuihei gui cu thai co u ne, a cun ung ng’kyak ci gui nei, Ami mät ah cun ung ami mät awk ci gui nei.

¹⁶ Bawipa naw amät ah düng ciah am khoicha nak awn amät cu dang sak ci nei. Changshe gui cu ami mät ah shetkat nak ung ng’awk ci gui nei.

¹⁷ Sih nak cu changshe gui la Khanpughi hnu ng’tuk püi ci gui ah a phu ah kyak ci,

¹⁸ Cawi gha ci gui cu kä nawng gui phung khai, Dukhaih ci gui ah ng’ngaih u nak cu kä di düt khai.

¹⁹ Bawipa tho law ä! Chang naw kä ning m’khüt en sä! Chang khuihei gui cu na ma ah law püi gui ne, ami khan ah m’khoi cha gui ä.

²⁰ O Bawipa, kyihkyawk sak gui ä; Ngami chang düt ah ami kyak cu hmat sak gui ä.