SAM 89 - Cho Bible Common Language 2016

Pakhui Khüikha yah ung Ng’äi

¹ O Bawipa, ng’täi ciah nam hni nak cu angtäi sei ng’äi ah ka m’cu khai nei; Na bekhüt nak cu angtäi sei ka ng’shäu khai nei.

² Na m’hni nak cu kho ng’län ung om khai, Na bekhüt nak cu khan kho mik ah mäih ah khäng lä khai ciah ka hmat ci nei.

³ Nang naw, “Ka ghü ah chang awn ng’thumkhän cu ka bik ci nei; Ka changshäm David ung shai ka tak ci nei,

⁴ Nangmi ah hta ng’shon cu ngawi yä ghangpughang ah kyak khai, “Nang ah hta ng’shon cu ngawi yä ka khän sak khai,” na cik ci.

⁵ Cäicat vai na bi gui ah mawng khankho naw ng’äi m’cu ci; Bawipa, theingcim ci gui naw na bekhüt nak ah mawng ng’äi m’cu ci gui.

⁶ Bawipa, khankho ah nang ah mäih tumat phi kä om ci; Nang awn täng ciah khankho chang a u kä om ci.

⁷ Theingcim ci gui ah kongsi ung nang cu kyih aa vai ah na kyak ci, ngami ami van ah ka ah ng’düi ci gui.

⁸ M’gäi ciah Bawipa Khanpughi, nang ah mäih ah m’gäi ci a u kä om ci nei. O Bawipa, a mawng avan ung nang cu na bekhüt ci nei.

⁹ Nang naw huham mah ciah tuinu na uk ci; am lungshe nak ah tui ng’hnawk phi na ng’düm sak ci.

¹⁰ Nang naw nget ciah Rahab cu shudeng ne na ngawn ci; m’gäi ciah na thagui awn na ga gui cu tu ne na k’täm gui ci.

¹¹ Khankho cu nang ah ka, khomdek cun phi nang ah khäm ah kyak ci. Nang naw m’dekhan la a cun ung om ci a päng avan cu na pyang tham ci.

¹² Nang naw htum la siip cu na tüisho ci; Tabora la Hermon m’htung naw yeikyai ne ng’äi ning m’cu ci goi nei.

¹³ Nang cu na hlüngtai aih ci nei! Na thagui cu dämduh aih ci nei.

¹⁴ Na uknak khaw cu düngnak la ng’müi nak ung na k’süm ci nei; m’hni nak la bekhüt nak cu na bi nak phung ung dang ci nei.

¹⁵ Ng’äi m’cu ne ning khawihnah ci gui cu Na m’hni nak ah akdei ung om ci gui cu yeikyai aih ci gui nei!

¹⁶ Nang ah hmawk ah ngami cu ak hnüüp pum yeikyai ci gui, Na ninak cu ning m’taam ci gui nei.

¹⁷ Nang naw m’khüt nak akdäm na pe gui ci, na m’hni nak awn na na näng sak gui ci.

¹⁸ O Bawipa, nang naw kami ng’shung nak na na ghü pe gui ci; Nang, Theingcim ciah Israel Khanpughi naw kami ghangpughang na na pe gui ci.

David am Khanpughi ah Shaitak

¹⁹ Caupui bekhüt ciah na chang gui am muimang ung nang naw na m’thein gui cu, “Ming thang ciah gakap cu kei naw m’theithang nak ka pek ci; ka chang gui ung ka, ka ghü tumat-am mangkiang cu ka pek ci.

²⁰ Kei naw ka changshäm David cu ghangpughang ah hmoh ne, ng’cim ciah situi awn ka phyuh theh ci.

²¹ Kei ah ka thagui cu angtäi sei ani ung om khai. Kei ah ka huham naw ani cu khüighat sak khai.

²² A ga gui naw hnu ng’tuk püi ne kä näng khai gui; changshe gui naw kä tu hlawt khai gui.

²³ Kei naw a ga gui cu ka deng khai, ani gen ci phung cu ka ngawn khai.

²⁴ Kei naw ani cu ka m’hni khai, ani ung ka bekhüt khai; kei naw ani cu angtäi sei ka näng sak khai.

²⁵ Ani ah uknak kho cu Mediteranean tuinu ungka naw Euphratis tuinu ung khüt sei ka ng’shawng sak khai.

²⁶ Ani naw kei ah ma ah, ‘Nang cu ka pa la ka Khanpughi; ka ng’zi nak la ka hunbawi ah na kyak ci’ cik khai nei.

²⁷ Ani cu ka hta htük ah m’düih ne, ghangpughang gui avan ung akdäm pi k’bäih ah ka hmoh khai.

²⁸ Kei naw ani ung ka shaitak cu angtäi sei ka k’pang khai; Ani ung ka ng’thumkhän cu ngawi yä khäng lä khai.

²⁹ Ani ah ng’shon cu khankhomik ah mäih ah khäng khai, Ani ah hta ng’shon cu angtäi sei ghangpughang ah kyak khai.

³⁰ “Cun ung ani ah hta ng’shon gui naw ka thumkhän kä läk u ne, ka thumkhän ah mäih ah kä ami ghin ah a kyak ung,

³¹ Kei ah ka m’shüm thein gui cu a i ah kä sui u ne, ka thumkhän cu kä ami khäm ah a kyak ung,

³² Kei naw ami katnak cu ka m’kyuk gui khai. Ami cheishoh ah hmawk ah ka geinvai sak gui khai.

³³ Cun ung phi David ka m’hni nak cu kä ka pyai sak khai, Ani ung ka shaitak cu kä ka shum sak khai.

³⁴ Ani ung ka thumkhän cu kä ka pit sak khai, ani ung ka shaitak tumat phi kä ka la ba khai.

³⁵ “Hnü ät ang bäng ge ah ka ming Theing awn shai ka taak cu: “Kei naw David cu kä ka m’hleei phung khai.”

³⁶ Ani cu ngawi yä ng’shong bang khai; ani ah uknak kho cu hni ang shü ah chuih kei naw ka ngäng khai.

³⁷ Cun cu khankho mik ung bekhüt ne saksi ah ng’düi ciah cha ah mäih ah khäng khai.”

Ghangpughang ah Shum ah Phäh ah Ng’äi Kyah

³⁸ Cun ung phi nang cu na ghü ah ghangpughang ah khan ah na m’lungshe ci, ani cu hnu nah ne na ng’tuk püi ci nei.

³⁹ Nang naw na changshäm awn na thumkhän cu gäi ne, ani ah lukhu cu m’vut ung na chak pek ci nei.

⁴⁰ Nang naw a mang gaw k’pang cu gäi ne, ang shung nak im cu na m’di ci nei.

⁴¹ Cun pah ciah chang phung naw a khawh cu m’guuk pek ci gui; a im ng’phei van naw gaih tuk ci gui.

⁴² Nang naw a ga gui am näng nak pe gui ne; ami van na yei sak gui ci.

⁴³ Nang naw ami li khim cu du sak gui ne, ng’tuk nak ung na shum sak gui ci.

⁴⁴ Nang naw na mang hteipawng cu ghawh pe ne, a mang kyang cu m’dek ung na chak pek ci.

⁴⁵ Nang naw kä gham pha sei ghi sak ne, a yä na kawn na küm ci.

Phyawn nak Vai ah Taigü nak

⁴⁶ Bawipa, na ng’thup lä khai ma? Na m’lungshe nak cu a i güt mei ah mäih ah däi khai aw?

⁴⁷ Ka ghin nak ciah na na tüi gu avan cu na shüm vai nei.

⁴⁸ A u chang cu ka si ne ghing hlawt khai ang? A u chang naw ng’cim hmun ung ka amät k’phyawng hlawt khai ang?

⁴⁹ Bawipa, zan ä dang ciah na m’hni nak cu a hawi ang? David ah ma ah na shaitak cu a hawi ang?

⁵⁰ Kei, na na chang a i hlawk ah ami na shedam nak, changshe gui ah ng’plah ng’taam avan ka bäm ah mawng cu kä m’hnih en ä.

⁵¹ O Bawipa, na ga gui naw na ghü ah ghangpughang cu shedam nak ci gui nei! Ani cu a hteh nak päng ah shedam nak ci gui nei.

⁵² Bawipa cu angtäi sei m’taam vä! Amen! Amen!