SAM 88 - Cho Bible Common Language 2016

A Na M’htei Vai ah Ng’hui Ng’paa Nak

¹ Bawipa Khanpughi, ka Hunbawi, khaw hnüüpum kyap ne, khawmü ah na pei ah ka lawk ci nei.

² Ka taigü cu na ng’yak pe ne, na na m’htei vai ah ka ng’paa nak cu na ngaih pe ä!

³ Khüikha nak akda ka khan ah gawk law sei, m’htei pei ung ka ngo pyi ci nei.

⁴ Kei cu chang hei gui ah mäih ah ka si tuk khai ah kyak ci nei; ka thagui avan maih pyi ci nei.

⁵ Kei cu aksi gui ah ng’lung ah na nawng shüt ci gui nei; kei cu ng’cim hmun ung ngawn ne ami m’shän ah, nang naw lüng ne na m’hnih gui ah kä na m’hteihtang gui ah chang ah mäih ah ka kyak ci nei.

⁶ Nang naw kei cu thuuk ciah khui, hnüp pi bäih ne, thuup pi bäih ciah m’gawng ung na na yuk chah ci nei.

⁷ Na m’lungshe nak naw gih aih ne ka khan ah za yuk geih ci, A cun ah tui ng’hnawk ah ka ah kei cu ka ng’deng ci nei.

⁸ Ka teihpüi gui naw ami na nawng vai ah nang naw na bik ci nei; Ngami ka m’shemshai gui vai ah na bik ci nei kei cu na khai shi u sei kä ka lut law ba hlawt ci nei:

⁹ Ka geinvai ah hmawk ah ka mik phi tuu ci nei. Bawipa, a hnüüp tä nang cu ning khü ne, ka kut chang ne nang ah ka taigü ci nei.

¹⁰ Aksi gui ah hmawk ah nang naw cäi aih vai gui na m’dang khai ma? Ngami tho law ne nang ning m’taam khai gui ma?

¹¹ Ng’täi ciah na m’hni nak cu ng’cim hmun ungka naw ami pyen vai ang? Na bekhüt nak cu di nak ah hmun ungka naw ami pyen vai ang?

¹² Cäi-aih vai na m’dang gui cu, khaw ah hmüp nak ung hmuh vai ang? Na ni nak gui cu chang ah m’hnih gui ah kho ung hmuh vai ang?

¹³ Bawipa, na nam htei vai ah ka ning khü ci, a khaw ngawi tä nang ah ka taigü ci nei.

¹⁴ Bawipa, a i ah kyasei na na hnu nak ang? A i ah kyasei na na hteh taak ang?

¹⁵ Kei cu ka hmaw sang ung tün ne, ka geinvai ci, ka sih nak vai ng’et ci nei; Nang ah m’kyuk nak ah phuih gih awn ka yaica ci nei.

¹⁶ Ng’hüüt ciah na m’lungshe nak naw na shudeng ne, m’gäi ciah na tuk nak naw na m’di ci nei.

¹⁷ Ak hnüüp pum ung tui k’hlaw ah mäih ah na koi u ne, ak kit päng ung na khai shi ci gui nei.

¹⁸ Nang naw ka teih püi gui k’cang naw phi ami na nawng vai ah bik ci sei, khomü hmüp bäng cu kei ah paw ah kyak ci nei.