SAM 86 - Cho Bible Common Language 2016

A M’hteihtang vai ah Taigü Nak

¹ Bawipa ka ng’thu ngai ne na m’shang ä, kei cu am gein kaa ah kya ne ka tha maih ci nei.

² Sih nak ung ka na hun ä, nang ung ka bekhüt ci nei; kei cu na hun ä, kei cu nang ah changshäm ah kya ne, nang ung ka ng’ap ci nei.

³ Nang cu ka ning Khanpughi nei, kei cu na chimgein ä, A hnüp pum nang ah ka taigü ci nei.

⁴ O Bawipa, na changshäm cu yei sak ä, A i ah kyasei ci ung kei ah taigü cu nang ah gawk ci nei.

⁵ Nang cu na nik ci, na na m’gein sei gui ci, nang ah taigü ci van ah khan ah na m’hni nak akbe om ci.

⁶ Bawipa, ka taigü cu nang ngai pe ä; Ka kyah cu ng’ya ne na m’htei ä.

⁷ Ka taigü cu na m’shang ci sei, ka khüikha päng ung ka ning khü ci nei.

⁸ O Bawipa, nang ah mäih ah Khanpughi a u kä om ci nei, nang ah bi ah mäih ah bik ci a u kä om ci nei.

⁹ Na tüisho ah pakhui avan naw law u ne, ning khawihnah lawk khai gui nei, na ng’ghawtai nak cu ngami naw m’taam khai gui nei.

¹⁰ Nang cu m’gäi ne cäi aih vai gui na bik ci. Nang bäng cu Khanpughi ah na kyak ci nei.

¹¹ Bawipa, ka bi vai na ng’yak hlü cu na m’thein ä, kei naw bekhüt ne ka ning läk khai nei. Akbe ah na khut ka bi vai ah na m’thein thang ä.

¹² O Bawipa, ka Khanpughi, ka m’lung kyong avan awn ka ning m’taam khai nei. Na ng’ghawtai nak ah mawng cu angtäi sei ka ng’shäu khani nei.

¹³ Kei ah phäh ah ng’täi ciah na nam hni nak cu a i hlawk ah dämduh ci ang? Nang naw ng’cim hmun mät ungka na na hun ci nei.

¹⁴ O Khanpughi, chang ah ng’shei ci gui naw law ne na hnu ng’tuk püi ci gui nei; m’gäi m’cik chang bum naw na ngawn khai gui ah tha nak ci gui nei. Cun ah chang gui cu nang a i ah kä ning ngai ci gui ah kyak ci nei.

¹⁵ Cun ung phi, O Bawipa, nang cu chimgein ci la m’hni ciah Khanpughi ah na kyak ci, angtäi sei, na hnimgei ci, na k’dük ci, na bekhüt ci nei.

¹⁶ Kei täng ah ng’hlat law ne na chimgein ä, k’thagui na k’be ne na hun ä, a i ah kyasei ci ung, kei naw ka nu ah mäih düt ah na khut ka bik ci nei.

¹⁷ Bawipa, na ni nak cu saksi awn na m’dang ä; m’lung üp nak la m’hteihtang nak na na pek cu ami hmuh ah akyak ung, kei na thüi nak ci gui cu lü khai gui nei.