SAM 85 - Cho Bible Common Language 2016

Lawngyung Khuikho ah Kho Ading vai ah Taigü nak

¹ Bawipa, na ng’lei khaw cu nak chimgein ci nei; Israel chang gui cu na bämang ba sak gui ci nei.

² Nang naw na chang gui ah katnak cu m’gein gui ne, ami cheishoh nak cu nak phyawn gui ci nei

³ Ngami ah khan ah nam’lungshe nak cu maih sak ne, na ngetngawng nak cu na pyei sak ci.

⁴ O Khanpughi, kami hunbawi, na ng’hlah law püi ba gui ä! Kami khan ah kä na yei nak cu düm sak ä!

⁵ Keimi ah khan ah angtäi sei na m’lungshe khai ma? Na m’lungshe nak kä gei phung khai ma?

⁶ Na k’thamah ba sak gui ä, keimi, na na chang gui naw kami ning m’taam khai nei.

⁷ O Bawipa, angtäi ciah na m’hni nak na hmuh sak gui ne, na hun m’htei nak cu na pe gui ä.

⁸ Bawipa Khanpughi ah ng’thu cu kei naw ka ngai ci nei; ani naw a chang gui, mikmi ah khan ah dim deeih nak shaitak ci nei, mi shetkat nak lam ah kä mi ng’hlat ba khai nei.

⁹ Ani m’taam khah ci phung cu akcang ah hun ge ci nei, Ani ah hun phyawn nak cu mi kho ng’lei ung puipa khai nei.

¹⁰ M’hni nak la bekhüt nak cu ng’chum ni ne, düng nak la dimdeeih nak cu ng’pawng khai goi nei.

¹¹ Chang ah ni kyom nak cu m’dek khan ung hang dang sei, Khanpughi ah ng’düng nak cu khankho ah yung dang khai.

¹² Bawipa naw na ng’bühmang sak gui khai, mi kho ng’lei phi pümhtang awn be khai.

¹³ Düng nak cu Bawipa ah ma ah hteit ne, Ani ah hmawk ah lam pyang khai.