SAM 84 - Cho Bible Common Language 2016

Khanpughi ah Im ung Atäng ah Om nak

¹ M’gäi ciah Bawipa, na Pum Im cu i hlawk ka m’hni ci ang!

² A cun ung a i hlawk ah ka om hlük ci ang? Kei cu Bawipa ah Pum Im ungka om hlük ci nei. Ghing ciah Khanpughi ah ka ghin nak avan awn yei ne ng’äi ka m’cu ci nei.

³ M’Gäi ciah Bawipa, ka ghangpughang la ka Khanpughi, Biit hta gui naw ami ng’bu tuk ci gui, müm kha gui phi ami im om ci; Ngami naw na mang kyang pei ah ami hta yüüt gui baw ci gui.

⁴ Na pum im ung om ci gui cu yeikyai aih ci gui nei, Ang täi sei ng’äi m’cu ne ning m’taam ci gui nei.

⁵ Nang ung thamah ci gui cu yeikyai aih ci gui nei, Ngami cu Zion m’htung ah hteh vai ah khüighat ci gui nei.

⁶ Ngami naw Baka khaw ng’gau sun ne ami hteh yah ung, cun ah hmun cu tui hta gui ah khawng nak ah kya lawk ci; Hting kho aa sei gäng tui long ne be ci.

⁷ Ngami cu gai law pi pi ne hteit ci gui; Ngami naw Zion mang gaw ung khanpughi gui ah Khanpughi cu hmuk khai gui nei.

⁸ M’gäi ciah Bawipa Khanpughi, Ka taigü cu na ng’yak pe ä. Ngai ä, O Jakob ah Khanpughi!

⁹ O Khanpughi, na ghü ah ghangpughang, kami ghangpughang cu hriham pe ä.

¹⁰ Na Pum im ung hnüüp ät om cu a hei ung ah hnüüp phia gha om ah ta bä pi ci nei. Changshe gui ah im ung om ah ta, ka Khanpughi ah Im kawt pei ah ng’düih cu ka m’hni pi ci nei.

¹¹ Bawipa cu mi ng’yi nak la bämang ciah ghangpughang ah kyak ci, m’gein nak la chang’sui nak awn hriham na pe gui ci. Düng nak bik ciah chang gui ah hmawk ah ni nak cu kä maa na phung ci nei.

¹² M’gäi ciah Bawipa, nang ung ng’ap ci gui cu yeikyai aih ci gui nei!