SAM 83 - Cho Bible Common Language 2016

Israel gui ah Ga gui Näng vai ah Taigü

¹ O Khanpughi, kä dim düt en ä; kä kuap düt en ä, kä om düt en ä!

² Teng ä! Na ga gui naw ning küknet püi u ne, Ning gen ci guui naw ning hnu ng’tuk püi ci gui nei.

³ Ngami cu nak chang gui hnu ng’tuk püi gui vai ah m’zih ne pawng ci gui nei; Na shungvong ah chang gui cu ng’hnu ng’tuk püi ci gui nei.

⁴ Ngami naw, “Law vä, ami pakhui mi m’di gui kaw, cun ung Israel pakhui ngawi ah phi kä om ba khai nei.”

⁵ M’lung ngaih täng sei ng’ge u ne, ning hnu ng’tuk püi khai ah ng’cut ne pawng ci gui cu:

⁶ Edom chang gui, Ishmaelit gui; Moab chang gui la Hagrits gui;

⁷ Gebala, Ammon, Amalek la Philistia la Tire chang gui ah kyak ci.

⁸ Assiria gui cun phi Lota ah hta ng’shon gui kyak ciah Ammonit la Moabites ni lam ah ami k’tha adäm vai ah ng’dawn tuk ci gui.

⁹ Kishon tuilawng pei ah Midianites, Sisera la Jabin ah khan ah na bi ah mäih ah n gami ah khan ah na bi vai nei.

¹⁰ Endora kho hmun ung nang naw tu gui ci sei, ami pumsa cu khomdek ung ng’dawn ci nei.

¹¹ Oreb la Zeeb ah khan ah na bi ah mäih ah ami ng’vai gui ah khan ah na bi ah mäih ah uk ci gui cu na tuk gui vai nei,

¹² ngami cu, “Khanpughi ah khaw cu gut ne mi khaw nak khai nei” cik ci gui ah kyak ci.

¹³ O Khanpughi, kho khi ah phai ah m’vut ah mäih ah, kho khi naw a zon ah ko ah mäih ah ngami cu ci gui ä.

¹⁴ Bung hmu mei naw a uih ah mäih ah, mei m’lei naw a tung ah khomhtung ah mäih ah

¹⁵ pui kho ah khi ne k’täm gui ä, kuipak ng’tum ne m’kyih gui ä.

¹⁶ O Bawipa, ami hmai cu thui ng’a nak awn uk gui ä, na huham cu hmuhmat sak gui ä.

¹⁷ Ngami cu angtäi sei näng gui ne kyihkyawk sak gui ä; Ngami cu si ne maih yawp u sä.

¹⁸ Nang bäng Bawipa ah na kyak la khomdek khan avan ung m’gäi ciah uktu ah na kyak cu hmat tu u sä.