SAM 81 - Cho Bible Common Language 2016

Lungnu ah Phäh ah Ng’äi

¹ Mi ng’yii nak ah Khanpughi ah yei ne ng’shäu vä; Jakob ah Khanpughi cu ng’äi awn m’taam vä!

² Kho k’bei m’shang ne, kho k’htung tum vä; Tingtäng la chingchawng yeikyai ne tum vä.

³ Cha theei yah la cha lum yah ung, lungnu ah hmawk ah k’phyung lawi tum vä.

⁴ Shin cu Israel gui ah thumkhän, Jakob ah Khanpughi ah pek ah kyak ci.

⁵ Egypt kho a tuk yah ung Israel chang gui am ani naw a pek ah kyak ci. Kei naw kä ka hmat ah ng’thu k’aw ka ng’yak cu,

⁶ “Kei naw nami phuih gih cu ka ning lak pe gui ci; Nami kawh ah lung phi ka ning chah pe gui ci; Nami kawh ah lung phi ka ning chah pe gui ci.

⁷ Nani geinvai yah ung na khü u ci sei, ka ning hun gui ci. Pui-kho kho ung ka ng’thuh nak ungka naw ka ning m’shang ci. Meribah tuihta pei ah kei naw ka ning m’nüm ci.

⁸ Ka chang gui, ka ng’cäi cu ngai vä; Israel gui, ka ng’yak hlü a i ah mäih ah ngai vä!

⁹ Nang naw a hei khanpughi kä na khawihnah vai.

¹⁰ Kei cu Egypt kho ah ka, ka ning law püi ba ciah, Bawipa na Khanpughi nei. Na shai m’an ä, ka ning m’bei khai nei.

¹¹ “Cun ung phi ka chang gui naw kä na ngai ci gui; Israel gui naw kä na läk ci gui.

¹² Cun ah kyasei ami ling nak ah hteh sak gui ne, ami ng’yak hlü ka bi sak gui ci.

¹³ Ka chang gui naw ami na ngaih vai ka m’hni aih ci; ami na läk vai phi ka m’hni aih ci nei!

¹⁴ Kei naw ami ga gui cu ang ghitah tu ne, ami ga avan cu ka näng khai nei.

¹⁵ Kei na thüi nak ci gui cu ka ma ah kyi ne kawp khai gui; Ngami ami m’kyuk nak cu kä ng’pyi hlawt khai nei.

¹⁶ Cun ung phi htang akni pi ning m’bei gui ne, khoi k’phyim tui awn ka ning phü sak gui khai nei.”