SAM 80 - Cho Bible Common Language 2016

Chang Pakhui gui Pyamtham nak ba gui vai ah Taigü nak

¹ O Israel gui ah htoshäm na ngai gui ä; Na htome gui ah bawi ng’vai na ng’ya gui ä. Na tüisho gui ang phyamah ah khan ah na mang kiang ung yu ngoh law ä,

² Ephraim, Benjamin la Manasseh pakhui gui ah khan ah na mät cu dang sak ä. Na hta gui na m’dang gui ä, law ne na hun gui ä!

³ O Khanpughi, na law püi ba gui ä! Na chimgein nak na m’dang gui ä, keimi naw hun nak kami hmuk khai nei.

⁴ M’gäi ciah Bawipa Khanpughi, Na chang gui ah taigü nak ah khan ah a i güt na m’lungshe khai ang?

⁵ Nang naw ei vai ah thüisei nak la awk vai ah ng’phlitui khapnu cu na na pe gui ci.

⁶ Nang naw kami pei leng ah pakhui gui cu, kami kho ami tuk vai la kami ga gui naw ami na shedam nak gui vai ah na m’shüm gui ci.

⁷ M’gäi ciah Khanpughi, na law püi ba gui ä! Na m’gein nak na m’dang gui ä, keimi naw hun nak kami hmuk khai nei!

⁸ Nang naw Egypt khaw ah ka sapyit shun cu law püi ne; pakhui hei gui k’täm gui neta, ami kho ung na geit ci.

⁹ Nang naw a thawh vai ah a hmun cu k’sei m’ghan ci sei, a pya thuk ne kho küm ne ng’shun ci.

¹⁰ A cun naw Khomhtung gui cu a püi awn hnim ci; Ang ban gui naw m’htai ging k’tai gui cu shung ci.

¹¹ Ani naw ang ban gui cu Mediteranean Tuithuk la Euphratis tuinu güt ah ng’phiah sak ci.

¹² A i ah kyasei ng’vong nak gui cu na gäi ang? Tuhbäi ung hteit ci päng naw ak theih cu m’guk ci gui nei;

¹³ M’nga gui naw kai na u ne, khisa gui naw ei awk ci gui nei.

¹⁴ M’gäi ciah Khanpughi! Keimi ah ng’hlat law ä! Khan ah om ne na yuk teng gui ä; Law ne na chang gui hun gui ä!

¹⁵ Na geit ah sapyit ng’shun cu law ne hun law ä, shin ah sapyit nong cu nang naw na khüighat sak ci nei!

¹⁶ Kami ga gui naw mei awn m’khih u ne, tupit ci gui ne; Na m’lungshe nak awn teng ne yuk m’di gui ä!

¹⁷ Na ghü ah chang gui la na khüighat sak ah pakhui gui cu shung ne ng’vong gui ä.

¹⁸ Nang ung ka keimi kä kami ng’hlat ba phung khai nei; keimi cu na ghin sak gui ä; kami ning m’taam khah khai nei.

¹⁹ M’gäi ciah Bawipa Khanpughi, na law püi ba gui ä. Na chimgein nak na m’dang gui ä, keimi naw hun nak kami hmuk khai nei.