SAM 79 - Cho Bible Common Language 2016

Pakhui ah Phyawn nak vai ah Taigü nak

¹ O Khanpughi, khuihei gui naw na khaw kaan lawk ci gui nei. Ngami naw na Pumim theing ng’gogan sak u ne, Jerusalem phi m’shet ci gui nei.

² Ngami naw na chang gui ah pumsa cu langta am vuh u ne, na shäm gui ah pumsa cu khisa ghi am m’bei ci gui nei.

³ Ngami naw nak chang gui ah si cu tui ah mäih ah huk u sei, si tui naw Jerusalem cu tui ah mäih ah lon ci, cun ung phi ami gook cu a u naw kä htüm tha ci nei.

⁴ Pei ng’len ah changpakhui gui naw na shedam na ne, na gaih m’gin ne, na päipih gui ci gui nei.

⁵ Bawipa, keimi ah khan ah na m’lungshe lä khai ma? Na m’lungshe nak naw mei ah mäih ah na ui gui lä khai ma?

⁶ Kä ning khawihnah ciah pakhui gui ah khan la kä ning taigü ciah chang gui ah khan ah na m’lungshe nak cu ng’hlah püi ä.

⁷ Na chang gui ami ngawn ah hmawk la na khaw ami m’shet ah hmawk ah cun ah na bi vai nei.

⁸ Kami pupa gui ah kat ah hmawk ah kä na m’kyuk en gui ä. Tuhbäi nak chimgein gui ä; kami ngaih u nak maih yawp ci nei.

⁹ O Khanpughi, na m’htei gui ä, na hun gui ä, na mät ning m’taam vai ah hmawk ah na gung gui ne kami katnak na m’gein gui ä.

¹⁰ A i ah kyasei changpakhui gui naw, “Nami Khanpughi a hawi ang?” cine ami na ng’shi gui ang. Na changshäm gui ah si ami huk ah phäh ah changpakhui gui na m’kyuk gui cu, na hmuh sak gui ä.

¹¹ Thawng ung kium ci gui ah ng’hlaw ng’ei cu ngaih pe gui ä, sih nak ami pek gui cu hlüngtai ciah na huham awn k’phiawn gui ä.

¹² Bawipa, changpakhui gui naw nang ung ng’lih khai ah ami ning shedam nak cu ak chih vei ah thung ba gui ä.

¹³ Kemi na na chang gui, na htome bum gui naw, ang’täi sei ning yei na u ne, ngawi yä kami ning m’hlüngtai khai nei.