SAM 78 - Cho Bible Common Language 2016Khanpughi La Ak Chang Gui 1 Ka chang gui aw, ka m’theithang cu ng’ngai ne, ka ng’thu cu ng’ya vä. 2 Kei naw cüi vai nak ng’thu ka pyen lawk khai thuk ciah amawng phyim gui ka ning m’thein gui khai. 3 Cun gui cu mi ng’yak gui pyi, mi hmat gui pyi, mi pupa gui ah na m’thein gui pyi ah kyak ci. 4 Mi hmaw gui am kä mi m’zih gui khai; Bawipa ah a huham, küikyang ciah a hnün thawh, la cäicat vai a bi gui cu mi hta ng’shon am mi m’thein gui khai. 5 Ani naw Israel chang gui am thukhän pe gui ne, Jakob ah hta ng’shon phi thumkhän pe gui ci. Ami hta gui-am ang thumkhän ami m’thei vai ah ani naw mi pupa gui cu m’thein m’kan gui ci. 6 Cun ah kyasei hta ng’shon naw cun cu ng’thei u ne, ami hta hmaw gui am m’thein ba khai gui. 7 Cun ung hta hmaw gui cun phi Khanpughi ung ng’ap ba u ne, ani ah bi cu kä m’hnih khai gui, angtäi sei ang thumkhän cu ngai khai gui. 8 Ngami cu ami pupa gui ah mäih ah kä kyak ci gui, ami pupa gui cu hnu ng’tuk u ne, ng’thu kä ngai u ne, Khanpughi ami yum nak kä ng’shing ci, kä bekhüt ci gui ah kyak ci. 9 Ephraim chang gui cu li la m’la kawt pang u ne phi, ng’tuk law ung dawng ci gui nei. 10 Khanpughi awn shai ami tak cu kä läk ci gui; ang thumkhän phi kä ngai ci gui. 11 Ani ah abi gui la cäi aih vai ani ung ami hmuh gui cu m’hnih yawp ci gui. 12 Egypt khaw, Zoan hmun ung, ami pupa gui ah ma ah Khanpughi naw cäi aih vai gui cu m’dang te ci nei. 13 Ani naw tuinu k’pai ne hteh sak gui ci; tui cu k’paang ah mäih ah ng’lim sak ci. 14 Kho hnüüp ah ng’mei awn lam shüm gui ne, khomü pum ung mei awn khang gui ci. 15 Ani naw kho ng’gau kho ah lung k’song cu ng’bo sak ne, ak thuk ungka tui cu pe gui ci. 16 Lung k’song ung ka, tui k’ci pawk sak ne, tuinu ah mäih ah lon sak ci. 17 Cun ung phi ngami cu katnak awn Khanpughi hnu ng’tuk püi lä u ne, bungpuk ah phi hlüngtai säih cicu hnu ng’tuk püi ci gui. 18 Ngami naw ami ei hlü ah ei cu k’thäh u ne, Khanpughi cu a guih ah m’nüm ci gui. 19 Ngami cu Khanpughi hnu ng’tuk püi ne ng’thu u ne, “Bungpuk ah Khanpughi naw ei vai na pe gui hlawt khai ang? 20 Lung tawk sei tui lut law ne long ci, cun cu akcang ah kyak ci; cun ung phi ani naw m’htut mä na pe gui hlawt khai ang? Ak chang gui am meh mä pe gui hlawt khai ang?” cik ci gui. 21 Cun ah kyasei ami ng’thu ng’ya neta Bawipa cu m’lung she ci; Ani naw akchang gui cu mei awn huut gui sei, am lung she nak naw k’taap gui ci. 22 A i ah kyasei ci ung ngami ung ami yum nak kä om sei, a hun gui cu kä yum ci gui. 23 Cun ung phi ani naw Khan mawpi ah thu m’shäk ne, am kawt gui cu hmawn sak ci; 24 Ani naw Khankho ah ka, htang m’guh pe gui ne, ami ei vai manna m’htut cu yuk chak gui ci. 25 Cun ah kyasei ngami naw khankho chang ah ei cu ei ci gui, Khanpughi naw ami ng’yak hlü päng cu pe gui ci. 26 Ani naw kiang khokhi cu ng’hlah sak ne, a huham awn htum khokhi cu m’tho ci; 27 Tuinu kem ah laigin chü ah da ciah kha gui cu ani naw akchang gui ah om nak ah m’shen lawk ci; 28 Kha gui cu ami pigaw ng’lung ung ami phung gui veing ne kya lawk ci gui. 29 Cun ah kyasei chang gui naw ei u ne phü ci gui; Ami ng’yak hlü cu Khanpughi naw pe gui ci. 30 Cun ung phi ngami cu kä phü pha u ne, ei ami ei sangung, 31 Khanpughi cu ami khan ah m’lung she neta, Israel gui ah ak gai pi gui la ak phet pi hmaw chang gui cu ngawn gui ci. 32 Shin ah amawng gui om pang sei phi chang gui cu akshe bik ci gui; cäi aih vai gui m’dang pang sei phi ani ung kä ng’ap ci gui. 33 Cun ah kyasei ami kho hnüüp cu ng’ghi ah mäih ah ng’pyi sak gui ne, ami ghin nak cu nat nak awn khüm gui ci. 34 Ani naw a ngawn gui ung k’pawih ba ci gui cu ani ah law ba ci gui; ngami cu ng’yu ba u ne, ani ah ma ah akni ah taigü ci gui. 35 Khanpughi cu ngami ah ng’shung nak, akhlüng tai säih cu law ne khüi vong gui ci, ciah shüm ba ci gui. 36 Cun ung phi ami thu phung cu hleei ah kya ne, ami ng’htau ng’düng ci kä om ci. 37 Ngami cu ani ah khan ah kä chang m’sui ci gui, ani awn ami shaitak ung kä bekhüt ci gui. 38 Cun ung phi Khanpughi naw akchang gui cu, chimgein gui ci. Ani naw ami katnak m’gein gui ci, kä m’di gui ci. Ani cu akda vei am lung üüp ci, am lung she nak cu m’cäi ba ci. 39 Ngami cu pumsa ah ami kyak la khokhi ah mäih ah khi ne ng’kon ciah ami kyak cu ani naw shüm ba ci. 40 Ngami naw ani cu bungpuk ah ashäng shäng hnu ng’tuk püi ci gui; akda vei m’thüi ci gui! 41 Ngami naw leng ba ba ne Khanpughi cu m’nüm u ne, Israel ah Paciim Khanpughi cu nat sak ci gui. 42 Ngami naw hlüngtai ciah a huham cu m’hnih u ne, ga gui ah kut ung a gun nak gui ah hnüüp la 43 Egypt khaw Zoan hmun ung am dang ah küikyang ciah a hnün thawh gui la cäi aih vai gui cu kä shüm ba ci gui. 44 Ani naw tuinu gui cu si ah ng’lat sak sei, Egypt chang gui naw ami awk vai tui kä om ci. 45 Ani naw ami ng’lung ah k’pi m’kawm gui chah sei geinvai ci gui, k’u cha sei ami khaw shek ci. 46 Ani naw m’khagek gui chah ne, ami geit gui ei sak ne, ami lo gui m’di sak ci. 47 Ani naw ami sapyit ng’shun gui cu gäi awn bok sak ne, ami thei ghing gui khüi awn toi shi sak ci. 48 Ani naw ami sei gui cu gäi awn, ami hto me gui cu mei däi awn ngawn gui ci. 49 Ani naw am lung she nak la am gäi nak awn sih nak ng’shä cu tüih gui ne, aktung ah khüikha sak gui ci. 50 Ani naw am lung she nak cu kä üüp e, ami ghin nak cu kä ng’vang na gui ne, leigaai awn ngawn gui ci. 51 Egypt chang gui ah akyong päng ung ami hta htük gui avan cu ngawn gui ci. 52 Cun kawn ah ani naw akchang gui cu, htoshäm ah mäih ah khah püi gui ne, bungpuk phlan ne hteh püi gui ci. 53 Ani naw phyawn püi gui sei ngami cu kä kyikyawk ci gui; cun ung phi ami gaa gui cu tuinu naw hteh gui ci. 54 Ani naw theingcim ciah a kho, amät ah näng nak ah m’htung ah hteh püi gui ci. 55 Ani naw ami ma ah ana om ci gui cu k’täm gui ne, ami khaw cu Israel pakhui gui-am k’pai gui ne, ami im gui phi ak chang gui am pe gui ci. 56 Cun ung phi ngami naw Bawimang Khanpughi cu hnu ng’tuk püi u ne, ani cu m’nüm ci gui. A ng’thumkhän phi kä läk ci gui, 57 ami pupa gui ah mäih ah ng’lih ng’lak u ne, kä bekhüt ci gui, Ng’hleek ne zong ciah m’la ah mäih ah ngaih u vai kä kyak ci. 58 Ngami naw akshe ah ami khawihnah nak awn m’lung she sak u ne, a gup gui awn am lung thüi sak ci gui. 59 Khanpughi naw cun cu hmu neta m’lung she ci, akchang gui cu akbät ah hnu ng’tuk püi gui ci. 60 Ani naw Shilon ah a phung cu nawng shüt ci, cun cu a om nak püi gui te ah im ah kyak ci. 61 Ani naw a huham la a bäimang nak ah kyak ciah Thukhän m’kü cu ga gui ah kut ung a gawk vai ah bik ci. 62 Ani cu akchang gui ah khan ah m’lung she neta, ami ga gui am ngawn sak gui ci. 63 Pami nong gui cu ng’tuk nak ung ngawn gui u sei, hnumi nong gui ah ami cei vai kä om ba ci. 64 Taigü gui cu akshe ung si u sei phi, ami chu hmei gui cu kä kyap ci gui. 65 Ak hnu ah Bawipa cu ip te ciah chang ah mäih ah, sapyit tui aw te ciah chang m’gäi ah mäih ah tho law ba ci. 66 Ani naw a ga gui cu k’tääm gui ne, angtäi sei lü ng’aa sak gui ci. 67 Cun ung phi ani naw Joseph ah hta ng’shon gui cu hnu ng’tuk püi gui ci; Ephraim pakhui phi kä ghü gui ci. 68 A cun ah hnün ung ani naw am hni pi ah Judah pakhui la Zion m’htung cu ghü ci. 69 A cu ah ani naw ak Taigüim co ci, cun cu khankho ah a im ah mäih ah kyak ci, cun cu khomdek ah mäih ah m’düih ne, angtäi sei khän sak ci. 70 Ani naw akchangshäm David cu, a htome gui ashäm nak ah htongvong kyong ung ka ghü ne, 71 Israel ghangpughang ah hmoh ne, Khanpughi ah chang gui ah htoshäm ah m’düih ci. 72 David naw amät ah hmawk vai düt kä ngaih na ne, cüivai nak awn m’hteihtang gui ci. |
Cho Bible Common Language © Bible Society of Myanmar, 2016.
Bible Society of Myanmar