SAM 77 - Cho Bible Common Language 2016

Geinvai Sang ung A M’hteihtang nak

¹ Khanpughi ah m’lau ne ka ng’khü ci; m’lau ne ka ng’khü ci, ani naw na ng’yak pek ci.

² Khüikha nak a gawk law yah ung Bawipa ah ka taigü ci; Khawmü pum kut shäng ne ka taigü ci, cun ung phi m’lung üp nak kä ka hmuk ci.

³ Khanpughi ka ngaih-tüh ung ka häi ci, Tüüp ne ka ngaih ung ka tha ken ci.

⁴ Amü pum ka ci m’gang khai ah na ngung ci; Ng’ä ai aih ne kä ka ng’thu hlawt ci.

⁵ Ng’kawn pyi ciah hnüüp gui cu ka ngaih-tüh ci, ng’pyi pyi ciah khokum gui cu ka shüm ba ci.

⁶ Ak thuuk ah ngaih-tüh ne, khomü ka ng’pyi sak ci; Tüüp ne ngai neta, shicha ah ka mät cu ka ng’shik ci:

⁷ “Bawipa naw ak phlüt sei na hnu na gui khai ma? Kä na yei na ba gui phung khai ma?

⁸ A na m’hni nak gui ng’pyi sak khai ma? A shaitak cu kä om ba khai ma?

⁹ Khanpughi naw ana m’gein nak gui cu m’hnih en khai ma? Ana kük nak gui cu am lung she nak naw ng’hlah püi khai ma?

¹⁰ Cun kawn ah kei naw, “Kei na leim sak pi cicu — Khanpughi cu kä huham ah ba ci nei” ciah kya ci.

¹¹ Küikyang ciah na hnün thawh cu ka shum ba khai nei, Bawipa; Zan ä na bi ah cäi aih vai gui cu ka khü ba khai nei.

¹² Na bi pyi gui avan cu ka ngaih-tüh ba khai nei; küikyang ciah na hnün thawh gui cu tüüp ne ka ngai khai nei.

¹³ O Khanpughi, na bi phung cu ng’ciim ci nei. Nang hlawk ah bä ciah Khanpughi hei kä om ci nei.

¹⁴ Nang cu cäi aih vai bi bik ciah Khanpughi ah na kyak ci; Nang naw pakhui gui ah ng’lung ah na bäimang nak na dang sak ci.

¹⁵ Jakob la Josef ah hta ng’shon na chang gui cu na huham awn na hun ci.

¹⁶ O Khanpughi, tui gui naw ami ning hmuh ung kyik ci gui, tuinu phi a khui ah ng’thüng ci.

¹⁷ Khong’mei naw kho aa sak ci; khankho mik ah kho ng’hmum ng’kyeek sei, kho cawi van ung lailäp ne khang ci.

¹⁸ Na kho ng’hmum ng’kyeek ne ng’liim sei, lailäp ne ng’shü ci naw m’dek han chang ci; khomdek ng’hlet ne thüng ci.

¹⁹ Nang cu tui ng’hnawk ah khan ah htei ne, tuinu thuk cu na kan ci, cun ung phi na kho neh cu kä hmuh hlawk nei.

²⁰ Moses la Aaron ah lam ma nak awn nang naw na chang gui cu htoshäm ah mäih ah na khah püi gui ci.