SAM 76 - Cho Bible Common Language 2016

Näng ciah Khanpughi

¹ Judah khaw ah Khanpughi cu hmat ci gui; Israel gui naw ang ming cu m’taam ci gui.

² Ani ah mang im cu Jerusalem ah om ci; ani cu Zion m’htung ah om ci.

³ A cu ah ga gui ah m’la cu khep ne, ami shawi, ami chim, li htei avan cu m’di ci.

⁴ O Khanpughi, na bä mang aih ci nei! M’htung ah ka ga näng ne na ng’hlah law ba cu chünla ci nei.

⁵ M’gäi ciah ga kap gui ami van naw ami kawh chah yawp u ne, sih thagui la ami m’khüt nak avan cu a kholä ah kyak ci nei.

⁶ O Jakob ah Khanpughi, nang naw na m’cäi gui yah ung, ng’se gui la ng’se ung ng’cum ci gui cu si yawp ci gui nei.

⁷ Cun ung phi nang Bawipa cu van naw ning kyih ci nei. Nang na m’lung she yah ung na ma ah a u kä ng’düi hlawt ci nei.

⁸ Nang naw khankho ah hmat vai ah na m’khoi m’chak ci nei; khomdek cu kyi ne a düm ah om ci nei,

⁹ Cun cu khomdek khan ah ng’neim ci gui hun vai ah, m’khoi m’cha nak ng’shäu ne na thawh law sang ah kyak ci nei.

¹⁰ Chang ah m’lung she nak naw ning m’hlüngtai khai nei; Ng’tuk nak ung k’pawih ci gui naw na pawi bik khai gui nei.

¹¹ Nami Bawipa Khanpughi ah ma ah nami shaitak nak bi vä; Apei leng ah ka pakhui avan naw m’cümhnah nak law püi vä. Chang van naw a kyih vai ah Khanpughi naw bik ci nei;

¹² Chang k’om ciah mang hta gui cu neim sak gui ne, ghangpughang gui ah kyih vai ah kyak ci nei.