SAM 74 - Cho Bible Common Language 2016

¹ O Khanpughi, a i ah kiasei na na nawng gui ang? Na chang gui ah khan ah angtäi sei na m’lung she khai ma?

² Na chang gui shüm ba gui ä, a cau na mät naw na ghü gui ah kyak ci, changshäm ungka na mät ah pakhui ah na law püi ba gui ah kyak ci. Zion m’htung cu shüm ba ä, a cau na om nak te ah kyak ci.

³ A bäät ah shek ci gui cu m’khan shi gui ne hteit ä; kami ga gui naw Taigüim ung om ci phung avan m’di ci gui nei.

⁴ Na ga gui naw na pum im kyong ah näng li kaap u ne, näng nak m’dang nak ah ami näng yih phi yai ci gui nei.

⁵ Ngami naw sing chuk ciah chang gui ah mäih ah ami ghei awn sing gui cu chuk ci gui nei.

⁶ Ngami naw ami ghei la ami ng’ki gui awn k’peen shohpang gui cu shu sheiuh ci gui nei.

⁷ Ngami naw na Taigüim cu pye ne mei awn m’khih ci gui; ning khawihnah nak ah hmun phi m’shet ci gui.

⁸ Ngami naw m’hnoi ne htin hlü gui ci gui; kho avan ung hmun thein phung cu m’khih ci gui.

⁹ Theing ciah kami m’hnih nak gui cu ng’kawn yawp ci, prophet gui phi kä dang ba ci, cun cu a i güt lüng khai ah a u naw phi kä hmat ci,

¹⁰ O Khanpughi, kami ga gui naw a i güt ning gaih m’gin khai gui ang? Ngami naw na ming cu päipih lä khai gui ma?

¹¹ A i ah kyasei keimi na na m’htei gui vai ah na dam ang? A i ah kyasei na kut na hnu ah na thuh ang?

¹² O Khanpughi, nang cu ak htük ge ung kami ghangpughang ah na kyak ci; Nang naw akda vei na na hun gui ci.

¹³ Nang naw ghat ciah na thagui awn tuinu cu na m’chak ci, tuinu Saam gui ah lu phi na chüüng ci.

¹⁴ Nang naw Leviathan ah lu cu dep ne a pum sa cu ei hnei am na vuh ci.

¹⁵ Nang naw tui k’cüih tui khawng na pawk sak ci, tuinu lawng phi na kawi sak ci.

¹⁶ Nang naw mü la hnüüp cu na tüisho ci; Hni la cha phi a hmun phäh phäh ung na k’süm ci.

¹⁷ Nang naw khomdek ah ng’yung phi na m’hnüt ci, htui la cha phi na k’bäi ci.

¹⁸ Cun ung phi Bawipa, na ga gui naw ning gaih m’gin u ne, changshe gui naw ami ning päipih cu shüm ba ä.

¹⁹ Am gein kaa ah kyak ciah na chang gui cu, ga she gui ung kä ap en gui ä; Dukdeiu ciah chang gui cu kä m’hnih en gui ä!

²⁰ Keimi ung na thukhän cu shüm ba ä. Kho a hnüp nak ah kho cawi päng ung shetkat nak bäng ah kyak ci nei.

²¹ Ami shedam nak gui cu kä thui ng’a en u sä; Dukhaih ci gui la gein vai ci gui naw ning m’taam u sä.

²² Tho law, Khanpughi, na mät ah mawng cu shung vong ä! Ak hnüüp tä sei changshe gui naw ami ning gaih m’gin cu shüm hmat ä.

²³ Na ga gui ah ng’hawh ng’shaak cu kä m’hni en ä, Ning ng’vok püi ci gui ah k’aw cu pam cai lä ci nei.