SAM 73 - Cho Bible Common Language 2016

CAUK ATHUMNAK ( Sam 73—89 ) Khanpughi ah Taga nak

¹ Am lung theing ciah Israel gui ah khan ah Khanpughi cu akcang ah nik ci.

² Ka m’lung üp nak maih law hlük ci; ka yum nak phi maih law hlük ci.

³ A i ah kyasei ci ung changshe gui bämang ne ami khawhmah ah hmawk ah kei cu ka m’thüi m’khang ci.

⁴ Ngami cu na sei m’neh nak kä om ci; k’tha mah ne gai ci gui.

⁵ Ngami cu chang hei gui ah mäih ah kä m’neh m’awh ci gui; chang hei gui ah mäih ah kä khüikha ci gui.

⁶ Chang ah ng’shei nak äh awi u ne, m’ghä m’ce nak ah suinu sui ci gui.

⁷ Ami m’lung ung akshe ah phu ne, ami m’sin naw ak kaa bäng pawng püi ci.

⁸ Ngami cu chang gaih tu u ne akshe ah pyen ci gui, Ngami cu m’gäi u ne chang shedam nak vai bäng pawngpüi ci gui.

⁹ Ngami cu khankho Khanpughi akshe ah pyen u ne, m’dek khan ung chang päng phi yawshe nak ci gui.

¹⁰ Cun ah kyasei Khanpughi ah chang gui phi ngami täng ah ng’hlat u ne, ami ng’thu phi yum ci gui.

¹¹ Ngami naw, “Khanpughi naw a i kä hmat khai, A hlüng tai säih naw phi a i kä hmuk khai” cik ci gui.

¹² Cun cu changshe gui ah m’hni ah kyak ci. Ngami ung khawh da sei, gah täng law pi ci gui.

¹³ Kei cu ka mät theing cim sak ne katnak kä ka bi phung ung phi a kholä ah kyak ci nei.

¹⁴ O Khanpughi, kei cu nang naw ak hnüüp tä na yaica sak ne; a ngawi tä na na m’cäi cat ci nei.

¹⁵ Kei cu cun ah mäih ah ng’thu ka pyen ah akyak ung, kei cu nak chang tumat ah mäih ah phi kä ka kya hlawt khai nei.

¹⁶ Kei naw shin ah amawng cu ka hmat vai ah ka tha nak ci, cun ung phi cun cu

¹⁷ na pum im ung kä ka luh pha ah chuih khak aih ci nei. Cun kawn ah changshe gui ah khan ah a i ah kya lawk khai cicu ka hmat ci nei.

¹⁸ Nang naw ngami cu ng’nai ung m’hluh gui ne di nak ung nak chah gui ci!

¹⁹ Ngami cu ang ghit ah di ci gui; ang khä ah ng’pyi ci gui nei.

²⁰ Ngami cu kho ngawi ah maih ah ciah ng’mang ah mäih kyak ci gui nei; Bawipa, nang na thawh law ung ngami cu ng’kawn ci gui nei.

²¹ Ka m’lung she ne, ka ngaih a tä yah ung,

²² kei cu ui ai ah mäih ah kya ne; nang ah mawng cu kä ka ning hmat ci nei.

²³ Cun ung phi kei cu nang ung angtäi sei ka ng’et ci, Nang naw na kut awn na na k’pang ci.

²⁴ Nang naw na cüi vai nak awn lam na nam shüm ci, Ak hnu ah m’taam ne na na do khai.

²⁵ Nang ah kawn ah khan kho ah kei ah hmawk ah a u om ne ang? Nang ka ning yak hlü ah mäih ah ka ng’yak hlü khomdek khan ah a i om ne ang?

²⁶ Ka m’lung la ka pumsa cu cümbawng ci, cun ung phi Khanpughi cu ka ng’yak hlü avan ah kümbe nak ah kyak ci.

²⁷ Nang ung ng’shawng ne om ci gui cu nang naw na m’di gui khai; nang ung kä bekhüt ci gui cu nang naw na m’di gui khai.

²⁸ Cun ung phi kei ah hmawk läi ah, Khanpughi awn ng’et ne, uk ciah Bawipa shungvong nak hmu ne, ani ah bi phung ng’shäu cu cäcat vai ah kyak ci nei!