SAM 72 - Cho Bible Common Language 2016

Ghangpughang ah Hmawk ah Taigü

¹ O Khanpughi, na düng nak awn am khoicha thei vai ah ghangpughang cu m’theithang ä; Na mät ah düng nak cu m’shumphyuk ä,

² Cun ah kyasei ani naw na chang gui cu ni nak awn uk gui ne, dukhaih ci gui cu düng ci gui cu düng nak awn m’htei gui khai.

³ Kho lei avan cu khawh mah sä; ng’düng nak awn pui m’ca sä.

⁴ Dukhaih ci gui cu ghangpughang naw hmai kiang ne m’taga gui sä; cawi gha ci gui cu m’hteinghtang gui sä, ngami shedam na gui cicu hnim gui sä.

⁵ Hni ang shü ah chuih, cha a vai ah chuih, kho ng’län ung na chang gui naw ning khawihnah u sä.

⁶ Ghangpughang cu lai ah khan ah kho a aa mäih ah, ng’lei ah khan ah khüi a book ah mäih ah kya sä.

⁷ Düng ciah ah chang cu a ghin yah ung bämang sä, cha a vai ah chuih bühmang sä.

⁸ A uknak cu vangtäng tuinu ungka naw vangtäng tuinu ah khüt khai, Euphratis ungka naw kho cawi avan ung khüt khai.

⁹ Bung ah om ciah chang gui cu ama ah kawp lawk khai gui, a gaa gui cu m’dek ung ng’dap khai gui.

¹⁰ Spain la khohmun ghangpughang gui naw m’cümhnah nak pe lawk khai gui. Sheba la Seba ghangpughang gui naw khawihnah nak pe lawk khai gui.

¹¹ Ghangpughang avan ama ah kawp khai gui; changpakhui avan naw a khut bik khai.

¹² Ani khü ciah dukhaih ci gui, cawigha ci gui la khüikha ci gui cu gung gui ci.

¹³ Ghawipai ci la dukhaih ci gui cu m’gein gui ne, khüikha ci gui cu hun gui ci.

¹⁴ Ani naw yawshe nak la shedam nak ung gung gui sei, ngami ah ghin nak cu ani ung ni kyom ci.

¹⁵ Ghangpughang cu ghi ne ghing sä! Arabia kho ah ghui cu pe law u sä; Ang täi sei taigü pe u sä; Khanpughi ah m’shumphyuk nak angtäi sei om sä!

¹⁶ Kho do kho hmun ung htang-m’guh be sä; khogui khomhtung cu Lebanon ah mäih ah theih ciah sing awn be sä. Lolai ma ah khu m’ghaw abe ah mäih ah mang gaw gui cu chang awn be sä.

¹⁷ Ghangpughang ah ming cu a u naw kä m’hnih en sä; Hni a ghin ah chuih aming thang sä. Khanpughi naw ghangpughang hriham a pek mäih ah changpakhui van naw hriham cu ng’zoi u sä.

¹⁸ Israel Khanpughi, Bawipa cu m’taam vä! Ani bäng naw cäicat vai gui cu bi hning ci nei.

¹⁹ Ang täi sei aming küi cu m’taam vä! Abämang nak cu m’dek khan avan ung be sä. Amen! Amen!

²⁰ Shin cu Jesse ah hta David ah taigü ang pyi nak ah kyak ci.