SAM 71 - Cho Bible Common Language 2016

Angvai Hta ah Taigü

¹ Bawipa, nang ung ka ng’yii khai ah ka lawk ci nei. Kei kä na näng-en u sä!

² Nang cu na düng ci kyasei, Na m’htei ne na gung ä, ka thu ngai ne na hun ä!

³ Ka yii nak ah kya ne, m’gäi nak awn na shung vong ä, Nang cu ka yii nak la ka ng’shung nak ah na kyak ci.

⁴ Ka Khanpughi, changshe gui ung na gung ä, ami cheishoh nak ah huham ung na gung ä.

⁵ Uk ciah Bawipa, nang cu ka ning ngaih u ci nei; ka hmaw yah ung tün ne nang ung ka ng’ap ci nei.

⁶ Kei ka ghin nak chuih nang ung ka om ci; kei ka ng’tüi law ge ung nang naw na na shungvong ci, angtäi sei ka ning m’taam khai.

⁷ Kei ah ka ghin nak cu chang aka ah ng’thei nak vai ah kyak ci. A i ah kyasei ci ung nang cu khäng ciah ka shung nak ah kyak ci.

⁸ A hnüüp pum ning m’taam ne, na bäimang nak cu ka ng’shäu ci.

⁹ Kä na hnu ng’tuk püi en ä, kei ka ghi lawk ci; kä na nawg düt en ä, kei ka tha ken lawk ci.

¹⁰ Ka gaa gui naw ka ngawn hlü ci gui, Na ng’küükneet püi ne ng’thu htau ci gui.

¹¹ Ngami naw, “Ani cu Khanpughi naw nawng ci nei; k’tääm ne mi pha kaw, ani gung khai a u kä om ci nei” cik ci gui.

¹² O Khanpughi, kei awn kä ng’shawng en ä; ka Khanpughi, law hlah ne na m’htei law ä!

¹³ Kei na ng’tuk püi ciah chang gui cu shum ne di u sä. Kei tha na ne na däät ciah chang gui cu, lü ng’a ne thui hmai u sä.

¹⁴ Nang cu angtäi sei ka ning ngaih u kheng geng khai, ka ning m’taam law pi pi khai.

¹⁵ Nang ah ni nak cu ka pyen khai; a hnüüp pum ung na hun nak cu ka ngak khai, cun cu kei ah hmuh hmat ah mä bä pi ci nei.

¹⁶ Bawipa, Khanpughi, na thamah nak ung ka hteit khai; na mät ah ni nak bäng cu ka ng’shäu khai.

¹⁷ Ka hmaw sang ung tün ne angtäi sei na na m’htei ci, cäicat vai ah na hnün thawh ah mawng cu ka pyen lä ci nei.

¹⁸ Kei ka ghi lawk ci, ka lu phi ng’pyok ci, O Khanpughi, kä na nawng en ä! Na hlüngtai nak la na huham cu ng’shon päng ung ka ng’shäu güt, na om püi ä.

¹⁹ Khanpughi, na düng nak naw kho mik pha ci, a küikyang bi na bi pyi ci; nang ah mäih a u kä om ci.

²⁰ Geinvai nak la yaica nak cu ka khan ah na tüi law ci, cun ung phi nang naw ka thagui na m’küm khai, ng’cim hmun ung ka, na na thup khai.

²¹ Nang naw angtäi sei na na hlüngtai sak pi khai; Nang naw na na shungvong ba mä khai.

²² Kei naw akcang ah tingtäng tum ne ka ning m’taam khai; ka Khanpughi, na bekhüt nak ka m’taam khai. Israel gui ah a theing pi, tingtäng tum ne, ng’äi m’cu ne ka ning m’taam khai.

²³ Kei naw yei ne m’lau ne ka tum khawng khai; Na na hun pyi ah kya sei ka ghin nak avan awn ng’äi ka m’cu khai.

²⁴ Ak hnüüp pum ung, na düng nak cu ka pyen khai, a i ah kyasei ci ung, kei na hnim hlük ciah chang gui cu shum u ne, thui ng’a ci gui nei.