SAM 7 - Cho Bible Common Language 2016

Ataga Vai ah Mawng Taigü

¹ O Bawipa, ka Khanpughi, na na shungvong vai ah ka lawk ci nei; Na k’tääm nak ci gui ah chang van ah kut ung ka, na phyawn ne na hun ä,

² Kä cun ung ngami naw phongkawng ah mäih ah na chang ne, a u ah kä hun nak hning vai ah na hteh püi u ne, na phyit sek khai gui nei.

³ O Bawipa, ka Khanpughi, Kei naw a cun ah ka biah a kyak ung, ka kut ung cheishoh nak a om ah a kyak ung,

⁴ ka püipaw cu kat na ne, amawngma kä om ciah guttep ci ka kyak ung,

⁵ Ka ga gui naw na k’täm ne nap ha u sä, ngawn ne m’dek ung na m’shän u ne, ka hun gui cu m’vut ung k’caw u sä!

⁶ m’lungshe ne tho law, Bawipa! Ng’düi law ne, ka ga gui ah m’lung so nak cu hnu ng’tuk püi gui ä; Na mät tho law ne kei cu na m’htei ä! Taga nak cu nang ah m’düih ah kyak ci.

⁷ Cun ah kyasei, chang van naw ning k’buikhai gui ah ng’bum sak gui ne, a khan ah om ne yuk uk gui ä.

⁸ Nang cu hniciim chang avan ah suki ah na kyak ci. Kei täng ah m’choi cha ä, Bawipa; Kei ah düng cu nang naw hmat ci nei.

⁹ Nang cu düng ciah Khanpughi ah na kyak ci, Kami ngaih-tüh la kami ng’yak hlü cu na m’choi chak ci. Changshe gui ah shetkat nak cu ng’pyi sak ne Changni gui cu m’shumphyuk gui ä.

¹⁰ Khanpughi cu ka ng’shawi; a ng’thu ngai cicu ani naw hun ci.

¹¹ Khanpughi cu ng’düng ciah suki ah kyak ci, ani naw angtäi sei, akshe cu m’kyuk ci.

¹² Ngami cu kä ami ng’yu ba ah a kyak ung, Khanpughi naw ak khim k’tah ne, ali m’cung ne koi ge ci;

¹³ Ani naw sih nak ah likhim la ne, mei ah däi ciah m’la cu kaap ci.

¹⁴ Teng vä, a i hlawk ah changshe gui naw akshe ah m’lung ngai u ne; Khüikha nak pawng püi ne, chei khai ah ami bi gui cu!

¹⁵ Cun ung phi chang ah kyak nak vai ah ami cawh ah thai ung ami mät kya ba ci gui nei.

¹⁶ Ami mät ah shetkat nak cu ami mät ah lu khan ah ng’taih ba ci, ami kat nak, a mi mät ah khan gawk ba ci.

¹⁷ A ng’düng ah hmawk ah Bawipa cu ka m’hlüngtai ci, A hlüngtai säih Bawipa cu ng’ä awn ka m’taam ci.