SAM 69 - Cho Bible Common Language 2016

A Na M’htei Vai ah Ng’paa Nak

¹ O Khanpughi na hun ä! Tui naw ka hngü k’phaa pyi ci;

² Kei ng’än ng’nai thuuk ung ka lut ci, ka ng’leh nak vai kä om ci; kei cu tui thuk khui ah ka ng’kyak ci, tui ng’hnawk na k’plüm vai ci nei.

³ A na m’gein vai ah ng’khü ne ka cüm ci, ka dang phi ket ci nei. Ka mik awn kheing ne, na na m’htei nak cu ka shui ci nei.

⁴ Amawng kä om ciah kei na gen ci gui cu, ka lumu ah ta, da pi ci nei. Ka gaa gui naw ami hleei pyen ne na ng’küük neet püi ci gui, ngami cu m’gäi u ne kei na ngawn hlük ci gui. Kei naw kä ka m’guk phi na m’thung sak ci gui.

⁵ O Khanpughi, ka katnak gui cu na hmat ci nei, kei a i hlawk ah ka ang phi na hmat ci nei.

⁶ Hlüngtai ne uk ciah Bawipa, nang ung ap ci gui ah hmawk ah kei kä na ng’aa en sak ä. O Israel Khanpughi! Kei ah hmawk ah nang ning khawihnah ci gui kä thui sei sak-en gui ä.

⁷ Nang ah hmawk ah kei cu na päipih ci gui, kei cu thui ng’a nak naw na shung ci.

⁸ Kei cu ka phäi nau gui ung om k’tu ah mäih ah ka kyak ci, ka kyong khui ung kho hei chang ah mäih ah ka kyak ci.

⁹ Na pum im kyong ah ka khawihnah nak naw mei ah mäih ah na ui ci nei; nang ami ning päipih nak phi kei ah khan ah gawk lawk ci nei.

¹⁰ Kei ei hlawi ne hnim gei ngä sei, chang gui naw na päipih ci gui;

¹¹ Thüi nak sui, sui ngä sei, na gaih tuk ci gui.

¹² Ngami naw lam lung ungka mawng pyen u ne, awktat ci gui naw na ng’äi ci gui.

¹³ Cun ung phi Bawipa, kei läi cu nang ah ka taigü ci nei; Khanpughi, nak bäi nak ah khin ung kei cu nam shang ä. Küikyang ciah na na m’hni ah hmawk la na na hun vai ah na shaitaak ah kei cu na m’shang ä.

¹⁴ Ng’än ng’nai ung ka ka lut ci, na hun ä; gaa ah kut ung na gung ä, Tui thuk ung ka na khui ba ä.

¹⁵ Tui naw kä na k’plüm en sä; khui ung kä na m’hluh en ä, ng’cim hmun naw kä na m’zaw en sä.

¹⁶ Bawipa, bä ne ng’täi ciah na m’hni nak awn na m’shang ä; küikyang ciah nam gein nak awn ng’hlat law ä!

¹⁷ Na changshäm cu kä na ng’thuh tau ä; ka khüikha aih ci nei, tuhbäi na m’shang ä!

¹⁸ Kei ah law ne na hun law ä; ka gaa ah kut ung na gung ä.

¹⁹ Ka lü nak, ka thüi nak, kä ka düng nak cu nang naw na hmat ci nei; ka gaa gui avan nang naw na hmuk ci nei.

²⁰ Lü ng’ä nak naw ka m’lung na thüi sak sei, kei cu di nak ung ka gawk ci. Nam gein khai ngai ngä sei kä om ci, na m’htei khai kä ka hmuk ci.

²¹ Ei ka cawi sang ung zeeih ei na m’bei ci gui, tui ka gha sang ung ng’tuui tui na tu ci gui.

²² Ami näng ei cu ami di nak ah kya sä; ami ei theing cu ami zu ng’kyak nak ah kya sä.

²³ Ami mik mü sak gui ne, ami khei duut sak gui ä!

²⁴ Na m’lung she nak awn yuk shawi gui ä, na thüi nak naw lin gui sä.

²⁵ Ami khaw cu shiu sä; ami pyu ung a u kä om ba sä.

²⁶ Nang naw na m’kyuk cu ngami naw dukdeiu na tu ba ci gui; nang naw na leim bai sak nak gui awn geinvai sak ci gui ah mawng cu, ngami naw pyen ci gui.

²⁷ Ami cheishoh nak avan cu m’hnüt pe gui ä; na hun nak ung api ah phi kä gawk en sak gui ä.

²⁸ Ghin nak ca uk ung ka, ami ming cu, phiet gui ä; Na chang gui ung kä ng’käng-en tu u sä.

²⁹ Kei cu m’neh m’awh ne ka gein vai ci; O Khanpughi, na zu chang ne, na hun ä!

³⁰ Khanpughi cu kei naw ng’äi awn ka m’taam khai. M’küm to nak awn aküikyang nak cu ka ng’shäu khai nei.

³¹ Cun cu sei awn, aki mah awn khawihnah ah mä Bawipa naw m’hni pi ci.

³² Ami shedam nak gui naw cun cu ami hmuh ung yei khai gui; Khanpughi khawihnah ci gui cu ami thagui be khai nei.

³³ Bawipa naw dukhaih ci gui ah thu cu ngai ci, thawng ung kium ci gui cu kä m’hnih gui ci.

³⁴ Khanpughi cu khankho la khomdek, tuinu la a tüisho avan naw m’taam vä.

³⁵ Ani naw Jerusalem cu hun ne, Judah kho gawnu gui phi sa ba khai. A chang gui cu acun ah khaw ung om u ne, cun ah khaw cu khäm khai gui;

³⁶ Ak changshäm ah hta ng’shon gui naw khui m’düng khai gui, Ani m’hni ci gui ci, acun ah kho ung om khai gui.