SAM 68 - Cho Bible Common Language 2016

Pakhui M’küi nak Ng’äi

¹ Khanpughi tho law ne a gaa gui cu k’püi gui ci. Ani gen ciah chang gui cu dawng yawp ci gui.

² Meikhu cu khu ne a zon mäih ah ani naw k’täm gui ci. Mei ah pei ah khoichap tui ne alon ah mäih ah changshe gui cu Khanpughi ah ma ah di ci gui.

³ Cun ung phi düng ci gui cu ani ah ma ah yeikyai ci gui; ngami cu yeikyai ne m’lau khai gui nei.

⁴ Khanpughi am ng’äi m’cu vä, ng’äi ne aming m’taam vä; Ani ah hmawk ah lam pyang vä, ani cu ng’mei ung ng’cum ci nei. Aming cu Bawipa nei, ani ah ma ah yeikyai vä!

⁵ Theingcim ciah Taigüim ung om ciah Khanpughi naw hmei hta gui cu tengkhen gui ne, hmeinu gui cu m’hteihtang gui ci.

⁶ A om nak kä om ci gui-am im pe gui ne, Thawng kium ci gui-am päng ze nak lam shüm gui ci. Cun ung phi hnu ng’tuk püi ci gui cu kho kei ah om khai gui.

⁷ O Khanpughi, na chang gui na khah law püi sang ung, kho ng’gau kho na khum law sang ung,

⁸ Shihpi thüng ne, khomik ung ka tui kya lawk ci. A i ah kyasei ci ung Sinai Khanpughi, Israel Khanpughi a law ah hmawk ah kyak ci.

⁹ Nang naw kho angtäi aa sak ne, na ng’dü kho phi na kyäp sak ci;

¹⁰ Na chang gui naw a cu ah im co ci gui, Na ni nak awn dukhaih ci gui na m’htei gui ci.

¹¹ Bawipa naw thukhän pe gui sei hnumi akda naw thuni hteh püi ci gui:

¹² “Ghangpughang la a gakap gui cu dawng ci gui.” Im ah om shüt ciah hnumi gui naw ami khäm cu ng’pai ci gui.

¹³ Ngami ah mäih ah kyak ciah mü kha ah ang phya la ghui ah mäih ah pyü cak ciah amu ah mäih ah nami kyak khai. (Nangmi cu ng’tuk yah ung a i ah kyasei htaw ah ng’lung ah nami om ang?)

¹⁴ Hlüngtai ciah Khanpughi naw ghangpughang gui ang pai sak nak gui ah Zalmon m’htung cu khüi toi ah be sak ci.

¹⁵ Hlüng tai ciah Bashan m’htung, m’htung lai akda om ciah m’htung!

¹⁶ Nami hlüngtai nak awn a i ah kyasei, Khanpughi naw a om nak vai ah a ghü ah m’htung cu nami gheet taap ang? Bawipa cu acun ung angtäi ah om khai nei!

¹⁷ Tämkäp ah däm ciah m’gäi ng’se gui awn Bawipa cu Sinai ah ka theing ciim ciah hmun ah lawk ci nei.

¹⁸ Ani cu ak hlüng nak pi ah hteit ne, akda pha ne hteh püi ci; Ani ng’küknet püi ci gui naw m’cümhnah pek ci gui. Bawipa Khanpughi cu a cu ah om khai nei.

¹⁹ A hnüüp tä mi phuih na phuih pe gui ciah Bawipa cu m’taam vä; Ani cu na hun gui ciah Khanpughi nei.

²⁰ Mi Khanpughi cu na hun gui ciah Khanpughi; Ani cu sih nak ung ka nak phyawn gui ciah Bawipa mi Bawipa ah kyak ci.

²¹ Cheishoh nak ung khäng ne hteit ciah a gaa gui ah lu cu Khanpughi naw cheiuh khai.

²² Bawipa naw, “Kei naw Bashan ah ka nami gaa gui cu ka law püi ba gui khai; Tuinu li thuk ungka ngami cu ka khui ba gui khai,

²³ Cun ah kyasei nang naw ami si leh ci sei, na ui gui naw ami si cu ami hni ah m’leeik khai” cik ci.

²⁴ O Khanpughi, näng nak awn na law la Khanpughi ka ghangpughang, a theing ciim nak ung na law cu van naw hmuk ci nei.

²⁵ Ng’äi m’cu ci gui ma ci gui, hting k’bei tum ci gui hnu ci gui, ang lung ung k’htung bum ciah hnumi hta gui hteit ci gui.

²⁶ “Chang hli ng’bum ne Khanpughi cu m’taam vä, Jakob ah hta ng’shon avan naw Bawipa cu m’taam vä!”

²⁷ Ak htük bäih ah Benjamin, akyaw pi bäih pakhui lawk ci, cun kawn ah Judah ng’vai gui, cun ah hnu ah Zebulun la Naphtali ami ng’vai gui naw läk lawk ci gui.

²⁸ O Khanpughi, na huham dang sak ä, Keimi ah chaw ah na mang ah huham nei,

²⁹ cun cu ghangpughang gui naw khawihnah nak ami ning pek law nak ah Jerusalem na Taigüim ungka ah kyak ci.

³⁰ Tui hmuk ciah pyasa ah mäih ah kyak ciah Egypt gui cu m’cäi gui ä, sei nget gui ah kya ne ami hto gui awn om ci gui ah pakhui gui cu m’cäi gui ä, ngami cu ng’ui law püi ne kä ami m’khukdong pha güt m’cäi gui ä. Ng’tuk vai m’hni ciah cun ah chang gui cu k’püi gui ä!

³¹ Egypt khaw ah ka ng’shä gui law u sä; Sudan chang gui naw ami kut shäng ne Khanpughi ah taigü u sä.

³² M’dek khan ung kho päng gui, Khanpughi ah ng’äi m’cu vä, Bawipa m’taam ne ng’äi m’cu vä,

³³ Ani cu khawmik, cau khomik ung ng’cum ci nei. Ak aw ng’shan sei m’lau ci nei ngai vä.

³⁴ Khanpughi ah hlüngtai nak cu ng’shäu vä; A huham naw Israel khaw küm ne, A hlüngtai nak naw khan kho kpha ci nei.

³⁵ Israel ah Khanpughi, a theingcim nak ung ka lawk cicu kyih aa vai kyak ci nei! Ani naw akchang gui am thagui la huham pe gui Khanpughi kam taam ci nei.