SAM 66 - Cho Bible Common Language 2016

M’taam nak Ng’äi la M’hlüngtai nak

¹ Chang avan naw yei ne m’lau ne Khanpughi cu m’taam vä!

² A bämang nak ah aming ung ng’äi m’cu vä; bäkhäk ciah m’tam nak pe vä!

³ Khanpughi-am, “Na bilawh gui cu cäicat vai ah kyak ci nei! Na huham cu däm ciah ci nei, Na gaa gui naw ning kyih u ne na ma ah kawp ci gui nei.

⁴ M’dek khanchang nü naw ning khawihnah ci; Ngami naw ng’äi m’cu ne ning taam ci gui, ngami naw ng’äi m’cu ne na ming m’taam ci gui.”

⁵ Khanpughi ah bi, chang ah ng’lung ah cäicat vai ah a hlün thawh cu, law ne teng law vä.

⁶ Ani naw tuinu cu khaw kawng ah ng’lat sak sei, mi pupa gui naw tuinu cu khan ne hteit ci gui. Ani ah bi ah hmawk ah keimi kami yei ci.

⁷ Ani naw a hlüngtai nak awn angtäi sei uk ci, Pakhui gui cu yuk teng gui ci. A u naw tho ne ani kä hnu ng’tuk-en püi sä.

⁸ Pakhui avan naw mi Khanpughi cu m’taam vä; Nami m’taam nak cu ani naw ng’ya sä.

⁹ Ani naw ghin vai ah na shum gui ne, mi zu ng’kyak vai phung kä bik ci.

¹⁰ Nang naw na na m’nüm gui ci, Khanpughi; Ngui cu mei awn m’nüm ah kyak ci, cun ah kyasei na na m’nüm gui ci.

¹¹ Nang naw thai ung na na kyak sak gui ci, kami phuih khan ah akgih pi na na phuih gui ci.

¹² Nang naw kami ga gui am na na leh sak gui ci. Keimi mei la tui ah khan ah kami hteit ci, cun ung phi phyawn nak ah hmun ung na na hteh püi gui ci.

¹³ Kei naw na im ung m’khih ne ka ning khawihnah khai; kei naw ka shaitak ah mäih ah ka ning vawihpeh khai.

¹⁴ Ka geinvai yah ung, ka ning pek khai nei, cine ka pyen ah mäih ah ka ning pek khai nei.

¹⁵ Sonkiang ung m’khih vai ah htome cu ka ning pek khai; seipat la me gui awn phi ka khawihnah khai, meikhu cu khankhomik pha khai nei.

¹⁶ Khanpughi m’kümto ciah chang gui, law ne ngai law vä, kei ah hmawk ah abi gui cu ka ning m’thein gui khai nei.

¹⁷ Anam htei vai ah kei cu ka kyap ci; kei naw ng’äi awn ka m’taam ci.

¹⁸ Kei naw ka katnak gui cu ka nawng lä ah a kyak ung, Bawipa naw kä na ngai khai nei.

¹⁹ Cun ung phi Khanpughi naw akcang ah na ng’yak ci; Ani naw ka taigü ngai ci.

²⁰ Khanpughi ka m’taam ci, a i ah kyasei ci ung ani naw ka taigü kä hnu na ne, ng’täi ciah am hni nak phi kei ungka kä la ba ci.