SAM 65 - Cho Bible Common Language 2016

M’taam ngak nak la M’hlüngtai nak

¹ O Khanpughi, Zion ung ning m’taam cu keimi ah düng nak nei, Nang ung kami shaitak cu kami m’htek ci nei,

² a i ah kyasei ci ung nang naw taigü cu na ngai ci. Kho nü ung ka chang gui cu law u ne, ami katnak cu khei lawk khai gui nei.

³ Kami cheishoh nak naw na hnim gui ci, cun ung phi nang naw na nam geinsei gui ci.

⁴ Na ghü ah chang gui la na phung ung om khai ah na ghü ah chang gui cu yeikyai u sä. Keimi cu na im kyong ung akni gui la na pum im theing ung na hriham awn kami ng’büh ci nei.

⁵ Nang naw näng nak na pe gui ne, na na m’shang gui ci, cäicat vai bi ne na na hun gui ci. M’dek khan ah om ciah chang avan la tui ah m’cha nak ah om ci gui naw phi ning ngaih u ci gui nei.

⁶ Nang naw na thagui awn khomhtung gui cu k’süm ne, na hlüngtai nak cu na dang sak ci.

⁷ Nang naw tuinu gaai ne ng’hnawk ci phi na ng’düm sak ci, chang gui ah m’lau ne m’gäi nak phi na dim sak ci.

⁸ M’dek khan ung om ciah chang gui naw küikyang ciah nabi phäh ah cäi ci gui nei. Nang ah na bilawh naw yeikyai nak cu, m’dek vang ungka naw vang ah khüt khai ah law püi ci.

⁹ Nang naw na ng’dü khaw m’htei ne na m’dang nak cu; khaw na yuk aa sak ci, na bämang sak ci, m’dek na ni sak ci, tuihta na lon sak ci; khomdek phi geit awn na be sak ci. Shin cu nang ah bi lawh ah kyak ci.

¹⁰ Lai thawn nak vai khaw akda yuk aa sak ne, tui awn na ng’shik sak ci; Nang naw m’dek cu khawtui dän sak ne, phung ciah a ghing gui cu na thawh sak ci.

¹¹ Na ni nak awn bühmang nak na pek cu däm aih ci nei! Na hteh nak päng ah ei mang vai da ci.

¹² Kho hmun gui cu sei me gui awn be ne, m’htung ng’nawi gui ung yeikyai nak be ci.

¹³ Kho dou gui ung htome gui lum ne, güng nawi gui cu geit awn be ci. Apäng avan cu m’hlan ne ng’äi ne yei ci gui.