SAM 64 - Cho Bible Common Language 2016

A na Shungvong vai ah Taigü

¹ Kei ka khüikha ci, Khanpughi — ka taigü ngai ä! Ka gaa gui cu ka kyih ci nei ka hnun gui na hun ä!

² Changshe gui ah tängpang nak la chang ka gui ah ng’bum nak ung na shung ä.

³ Ami m’lei cu chim ah mäih ah m’ghü ci gui, ami thushe cu m’la ah mäih ah kyak ci.

⁴ Kä ami ng’a nak ah ami hleeihlak cu ang ghit ah k’püi ci gui; Akshe ah ami thu nak awn changnicu m’di ci gui.

⁵ Ak shekha pawng püi ne k’tha gui ng’pe tuk ci gui; a hawn ung cun vai cine ng’ge ci gui. “A u naw kä na hmu gui khai” cik ci gui.

⁶ Ngami naw akshe pawng püi u neta, “Keimi naw kümbe ciah cheishoh nak kami pawng püi ci,” cik ci gui. Chang ah m’lung la ngaih cu thuk aih ci nei.

⁷ Cun ung phi Khanpughi naw am la awn kap gui sei, ngami cu ang ghit ah leim ci gui.

⁸ A cun ah thu gui ah hmawk ah ani naw m’di gui khai; Ngami hmu gui ci phung naw ami lu thüng khai gui.

⁹ Ngami ami van kyihkyawk khai gui; Ngami naw Khanpughi ah bi lawh cu ngai neta, ani ah hnün thawh ah mawng cu pyen khai gui.

¹⁰ Bawipa ah bi lawh ah hmawk ah ng’düng ciah chang gui cu yei khai gui. Ngami naw ani ung phyawn nak hmuk khai gui; changnigui ami van naw m’taam khai gui.