SAM 63 - Cho Bible Common Language 2016

Khanpughi awn Ng’yak nak Hlü

¹ O Khanpughi, nang cu ka ning Khanpughi nei, kei cu nang awn ka ghing ci. Ka pumsa avan naw nang ning za hlük ci; chawng ne, ng’gau ne, tui kä om ciah ng’lei ah mäih ah ka mümcha naw tui ah ning gha ci nei.

² Na phung kyong ung na ng’hmuh püi ä; na m’gäi nak la na bä nak cu na hmuh sak ä.

³ Ng’täi ciah na m’hni nak cu hnun gui ah ta bä pi ci nei, cun ah kyasei ka m’taam khai.

⁴ Ka ghin ah chuih ka ning m’hlüngtai khai nei; ka kut shäng ne taigü ne ka ning m’taam khai nei.

⁵ Ka mümcha cu ei vai da ne, kyä khai nei, kei naw yei nak ng’äi m’cu ne ka ning m’taam khai.

⁶ Ih phak ung ka ng’zän ung phi ka ning shüm ci; am than pum ka ning ngaih-tüh ci,

⁷ a i ah kyasei ci ung nang naw angtäi sei, na na m’htei ci. Na ng’phia hnim ka ah yei ne, ng’äi ka m’cu ci.

⁸ Kei cu nang ung ak htek ah ng’pang ngä sei, Na kut naw kei cu na k’phyawn ci.

⁹ Kei na ngawn khai gui ah tha nak ciah chang gui cu sih nak ah kho ah hteit khai gui nei.

¹⁰ Ngami cu ng’tuk nak ung sik khai gui, ami pumsa cu sa-ui naw ei gui khai.

¹¹ Khanpughi ah a pek ah näng nak awn ghangpughang cu yeikyai khai. Khanpughi ah aming ung shaitak ci phung naw m’taam ngak khai, cun ung phi hleei ciah m’gawng cu khai pek khai.