SAM 62 - Cho Bible Common Language 2016

Khanpughi ah Shung Vong nak ung M’lung üp nak

¹ Nak phyawn khai ah Khanpughi cu ngaih gep ne ka ngäng ci; kei cu Khanpughi bäng ung ka ng’yung ci.

² Ani bäng naw na shung ne na k’phyawn ci; Ani cu ka ng’shung nak ah kyasei, Kei a i naw kä na hnim khai.

³ Nangmi naw a i güt chang tumat cu nami ng’tuk püi khai ang? Ani cu kiawi ciah k’pang ah mäih ah kyak ci nei.

⁴ Nang bäng naw ani cu m’tamkhah nak ah hmun ungka chah vai ah na ng’ya hlük ci. Nang na hleei pyen ne na yeikyai ci. Na shai awn hriham thu na pyen ci, cun ung phi na m’lung kyong ah ani na ng’plah ci.

⁵ Kei cu Khanpughi bäng ung ka ng’yung ci, Khanpughi bäng ka ngaih u ci.

⁶ Ani bäng naw na shung ne na hun ci; Ani cu ka ng’yii nak ah kyak ci, kei a i naw kä na hmim phung khai.

⁷ Kei ana hun nak la ka m’taam nak cu Khanpughi ung ng’yung ci; Ani cu m’gäi ciah ka ng’yii bawi, Ani cu ka ng’yii nak ah kyak ci.

⁸ Ka chang gui, ang täi sei, Khanpughi ngaih u vä. Nami khüikha nak avan m’thein vä, Ani cu mi ng’yii nak ah kyak ci.

⁹ Chang avan cu mei khu ah mäih ah kyak ci gui. Akzaw akdäm avan cu a kholä ah kyak ci. Ngami cu khin gui ung phi kä gih ci gui; Ngami cu khokhi ah yaang tu ba ci gui.

¹⁰ Chang ngawn pha vai kä na k’tha nak vai; Ng’gut tep ne näng vai kä na ngaih-tüh vai; Na ng’bühmang law pi ung phi acun ah khan ah kä na ng’düih vai.

¹¹ Hnü ät bäng ah kä kyak ciah ka ng’yak cu, Khanpughi naw, “Huham cu ani ah ka ah kyak ci.”

¹² Ani ah m’hni nak cu ng’täi ci ciah kyak ci. O Bawipa, nang naw chang avan cu amät ah om ih ciah na m’cümhnah ci.