SAM 60 - Cho Bible Common Language 2016

Phyawn Vai ah Taigü

¹ O Khanpughi, nang naw na hnu nah gui ne, na na hnim gui ci nei; Nang naw na na m’lung she na gui ci, — cun ung phi tuhbäi keimi täng ah na ng’hlat law ba ci.

² Khomdek cu thüng sak ne, na ng’bo sak ci; Tuhbäi ami ng’bo nak gui cu, cüm ba sak gui ä. Ami gai cu m’tui ä, a i ah kyasei ci ung, ani cu ng’gäi pyi ci nei.

³ Nang naw na chang gui cu akni ah khüikha sak gui ci nei, keimi cu awktat ne kami ng’phiui ci nei.

⁴ Nang ning chang m’sui ci gui cu nang naw m’cäi gui ci sei, Ngami cu didap nak ung phyawng ci gui nei.

⁵ Na thagai nak awn na hun gui ne, kami taigü na m’shang gui ä, cun ah kyasei na m’hni ah chang gui cu phyawng khai gui nei.

⁶ A theing ciim hmun ung om neta Khanpughi naw, “Nängnak awn Shekhem cu ka k’bo khai, Sukkoth kho ng’nawi cu ka chang gui awn ka pe gui khai.

⁷ Kilead cu ka khaw, Manasseh phi ka khaw. Ephraim cu ka lukhu, Judah cu ka bawimang ang dang nak ah kyak ci.

⁸ Moab khaw cu tui ka ng’si nak ah kyak khai, Edom cu ka phahnak ah ng’leh nak ah kyak khai. Cun cu ka ka ah a kyak ah mawng ka m’hnüt nak ah kyak ci. Philistin chang gui naw kei ah khan ah ng’näng ne m’lau khai gui ah ngai u ne ma?”

⁹ O Khanpughi, a u naw kei cu mang gaw ng’ai ah na luh püi khai aw? A u naw Edom khaw ah na hteh püi khai aw?

¹⁰ Keimi akcang ah na na hnu na gui khai ma? Keimi ah gakap gui awn atäng ah kä na ng’düi khai ma?

¹¹ Gaa näng vai ah na m’htei gui ä; Chang ah m’htei htang cu a kho lä ah kyak ci nei.

¹² Khanpughi cu mikmi lam ah om sei, mikmi mi ng’näng khai, ani naw mi gaa gui cu m’di gui khai.