SAM 59 - Cho Bible Common Language 2016

Phyawn nak vai Taigü

¹ Ka Khanpughi, ka gaa gui ak kut ung na k’phiawn ä: Na tuk hlük ci gui ung ka na shung ä!

² Changshe gui ah kut ung na k’phiawn ne; chang ngawn ci gui ah kut ungka na gung ä!

³ Teng vä! Ngami naw na ngawn vai ne, na ngäng ci gui nei; chang gat gui cu ng’bum ne na hnu ng’tuk püi ci gui nei. Cun cu kei naw hma katnak ka bi ah hmawk ah kä kyak ci nei,

⁴ O Bawipa, kei ah hmawk ah kä kyak ciah ngami cu tawt ne pawng ci gui nei.

⁵ Tho vä, Bawipa Khanpughi, A hlüngtai, law ne nam htei law ä; Israel Khanpughi, na mät naw hmu ä! Tho law ne kä yum ci gui cu m’kat gui ä, akshe bik ci gui cu kä m’gein-en gui ä!

⁶ Ngami cu mü lam ah law ba ne, ui ah mäih ah m’o ne mang gaw cu veing ci gui nei.

⁷ Ami ni ng’hawh shak shai la cu ngai tu vä. Ami m’gawng m’lei cu chim ghaat ah mäih ah kyak ci, cun ung phi ami ng’htau a u naw kä ng’yak ciah ngai ci gui.

⁸ Cun ung phi Bawipa, ngami cu na gaih tu gui ci, kä yum tu ci gui cu na päipih gui ci.

⁹ Nang ah tha gui ung ka khüi ci nei, Nang cu ka ning zi nak ci nei, O Khanpughi.

¹⁰ Ka Khanpughi naw na m’hni ne, kei ah gawk lawk khai nei; ka gaa gui ami di cu, ani naw na hmuh sak khai nei.

¹¹ O Khanpughi kä ngawn-en gui ä, cun ung ka chang gui naw m’hnih khai gui nei. Na thagui awn ng’pyek ng’pai sak gui ne hnim gui ä, O Bawipa, kami ng’yii nak.

¹² Ami m’gawng ung katnak om ci, ami thu avan cheishoh ci, ami chang om nak naw pha gui sä, a i ah kyasei ci ung ngami cu ng’plah täng hleei hlak ci gui.

¹³ Na m’lung she nak awn m’di gui ä, ami van m’di gui ä. Cun ung Khanpughi naw, Israel kho a uk la, khomdek khan van m’shawng ne a uk cu hmat khai gui nei.

¹⁴ Ka gaa gui cu mü lam ah law ba u ne, ui naw ng’na ne mang gaw a vein ah mäih ah kyak khai gui nei.

¹⁵ Ui ah mäih ah ami ei vai shui shüi shüi u ne phi, ami phü vai kä hmuh u ne ng’tawh khai gui nei.

¹⁶ Cun ung phi kei naw na thagui ah mawng ng’äi kam’cu khai; A ngawi tä sei nam hni nak ah mawng m’lau ne ka ng’äi khai. Nang cu ka ning shung nak, khüikha yah ung ka ning yii nak ah na kyak ci.

¹⁷ Ka ning m’taam khai nei, ka ng’shung nak kawi. Ka ng’yii nak cu Khanpughi, na m’hni ciah Khanpughi ah kyak ci.