SAM 58 - Cho Bible Common Language 2016

Changshe Am kyuk vai ah Khanpughi ah Taigü

¹ Nangmi uk tu gui, taga ciah k’bäi nak nami bi ne ang? Chang avan taga khai ah nami m’khoi m’cha ne ang?

² Nangmi cu, nami bi hning ah akshe bäng nami ngaih-tüh ci, kho ah khan ung shetkat ciah cheishoh nak nami bik ci.

³ Changshe gui cu ami ghin ah chuih hma kat ci gui; ami ng’tüi law ge ung ami hleei pyen ci gui.

⁴ Ngami cu k’phyu ah mäih ah ami m’äm be ci; Ngami cu ami hnga pang ciah k’phyu ah mäih ah ami hnga kä ng’yak ci.

⁵ Ani cu phyu-k’däk ciah k’aw, thuvi ciah k’ce ah k’phyuh cu kä ng’ya hlawt ci.

⁶ O Khanpughi, shin ah kawng gui ah ha cu cheiuh pe gui ä.

⁷ Ngami cu tui akawi ah mäih ah maih u sä; Ngami cu lam ung m’ghaw ah mäih ah güüt gui u sä.

⁸ Kikawlawk akhui ah ava luh a mäih ah, hta m’gai ami yawih nak naw akdei kä a hmuh tu ah mäih ah kya u sä.

⁹ Kä ami hmat pha ung, ngami cu m’ghaw ah mäih ah k’pai gui u sä; kyih vai ah am lung she nak awn, Khanpughi naw ak ghing ah muut hlit gui sä.

¹⁰ Cheishoh ci gui ami m’kyuk gui ami hmuh ung düng ciah chang gui cu yei khai gui nei; Ngami naw changshe gui ah si awn ng’si khai gui nei.

¹¹ Chang gui naw, “Düng ci gui naw m’cümhnah akcang gah ci gui; m’dek khan m’khoi m’chak ciah Khanpughi cu akcang ah om ci nei” cik khai gui.